India nungeri bendanglen US sen billion 490 rizünga lir

New Delhi, June 25 (Agencies): India nung tongtibang institutes asem- National Institute of Public Policy and Finance (NIPFP), National Council of Applied Economic Research (NCAER) aser National Institute of Financial Management (NIFM)-i 2010 küm tashi nung India nungeri bendanglen US sen billion 490 rizünga aliba asadangtetogo.
Hombarnü Lok Sabha nung standing committee on finance-i benokba nunga iba report indangji shia lir.
India nungeri linük nung aser bendang linüktem nung ochimashi sen rizünga ayuba bushisüngdangtsü atema sorkari sponsor süa 2011 küm tenzükba maparen nung tang mezüng iba osang sangdonger.
Taoba UPA sorkar mapang nunga iba dak sendakba report ka agütsü, ajisüaka tang tashi nungbo iba osang yimjak nung memetetdaktsü.
National Institute of Public Policy & Finance-i, 1997-2009 kümtem nung linük nungi ochimashi sen tangaleni bendenbaji GDP shilem 0.2% nungi 7.4% liasü ta asadangtet. National Council of Applied Economic Research-ia, 1980-2010 kümtem nung India nungeri bendanglen ochimashi sen rizüngbaji US sen billion 384 nungi billion 490 liasü, ta metetdaktsü. Maneni National Institute of Financial Management-i,1990-2008 kümtem nung India nungeri bendanglen rizüngba ochimashi senji crore 9,41,837 (US sen bn. 216.48) liasü ta asadangtet.
India nungeri ochimashi sen bendanglen rizüngbaji ochimashi sen shilem 10% shia liasü. Hombarnü Lok Sabha nung benokba standing committee report ya mezüng March 28 nü M Veerappa Moily-i aniba committee-i Lok Sabha Speaker ket nung agüja liasü.