Myanmar anasa lenmang yanglutsü atema sen crore 100 meshir

Manipur chief minister N Biren Singh-i Behiang yimtsüng nung police station lapoktsüdang agiba noksa angur. 

Imphal, June 25 (Agencies): Manipur sorkari Indo-Myanmar arrtsü anasa ring road ka yanglutsü atema Centre dang sen crore 100 meshir.
India-Myanmar arrtsü anasa Mizoram den arrtsü aliba yimtsüng nungi Ukhrul district kübok Nagaland den arrtsüla aliba tesem tashi lenmang yanglutsü atema Centre dang sen crore 100 meshiogo, ta Manipur chief minister N Biren Singh-i ashi.
Myanmar den arrtsüa aliba Churachandpur district kübok Behiang yimtsüng nung police station ka lapoktsüdang pai iba osang metetdaktsü.
Behiang ya kanga dang tongtipang tesem ka lir kechiyong iba ya Moreh sülenbo South East Asia linüktem den sendaktepba tanabuba tesem lir, ta Biren Singh-i ashi.
Moreh nung ama Behiang nunga trade centre ka lapoktsü aser iba ajanga Myanmar den shishilembaba ajungkettsü, ta paisa shisem.
Biren-isa Behiang police station nung mapa lemzüktsüba police dang ozüng alema arurtem aser ozüng alema mozü shibelenba maparen jungjunga mittsü atema tetuyuba agütsü.
Biren-i chief minister akümba sülen tang agi tanabenbuba atema Behiang semdangogo. in December 2017 nung pai mezüng semdangdang police station yanglutsü indang lung azünga ayutsü.
Yashi pai Behiang police station lapoktsüba sentong nung adentsü aodang minister Karam Shyam (revenue), minister Losii Dikho (public health engineering), minister Th Shyamkumar (forest and environment), minister V Hangkhanlian (agriculture), minister Th Radheshyam (education) aser tongti ketdangser aikati mein.