SC nung PIL benokba khukhua aitsür: NNPGs

Dimapur, June 25 (TYO): Bharatiya Janata Party (BJP) indang National Leader kati Supreme Court nung PIL ka benokba khukhua aitsür ta Naga National Political groups-i metetdaktsü.
India sorkar aser Naga National Political Groups (NNPGs) tsüngda olemtep tatemleni aruba mapang ka nung BJP State unit-i iba PIL atema National Leadership nem osang sangoktsütsüba liasü, kechiyong iba ajanga Naga loktiliba nung mepelatep aser mangatettep adoktsü, ta NNPGs-i ashi.
Nagaland State BJP unit-i Naga nunger ajak ya India sensotem kümdaktsünür aser iba ajanga PIL ya benok asütsü akok ta onoki bilemer. BJP aser NDPP lennirtem taoba hopta New Delhi nung munga liasü anungji BJP lennir kati iba ama mapa tamajung inyakba osang memetet ta nenoki meshitettsü. Iba ya pa kijai bilema inyakba mapa ka ta ashitsü makok, ta NNPGs-isa metetdaktsü.
India putiotsü nung Nagaland ya dang federal unit lir aser parliament indang Act kecha medeni state kümtet. February 18, 1961 nü Council of Naga Tribal representatives den Nagaland kümtet, ta NNPGs-i ashi.
Naga nunger ya constitutional telatetbatem kübok dendaktsüra, ibaji asenok sasa soseta asür ama asütsü. Naga nungeri timtem kar dang ajurura iba tebilemtsüji Nagaland BJP-i abentsü.
Kodaser Dimapur nung non-Naga nunger tenüng nung ken o ka benoktsü akok? Iba ama Naga nunger anema inyakba mapa kodanga magizüktsü. Iba kasa nisungji Arrla 370 anema PIL ka benok aser tang North East Frontier Regulation ajanga pai okadak Arrla 371 A benokogo. Iba onük atema Nagaland BJP-i kecha memetet ta ashitsü makok, ta NNPGs-isa metetdaktsü.
Nagaland BJP aser parnok den yariteper NDPP-i aibelen inyakyimtem metongshitsüla. India sorkar aser Nagaland tsüngda ozüng mesüra temzüng kar atema mangatettep adokra, ibaji okadaki masü saka yimten olemtep mapang angatetteptsüla. Nagaland sorkaria okadak ajak dang India sorkar aser Naga Political Groups tsüngda tang tejembidak yimten onük indang osang metetdaktsütsü, ta NNPGs-isa ashi.