AAP-i maksü bener arütsüogo, Delhi nüng menüktsüogo: Cong

New Delhi, July 10 (Agencies): Delhi nung Aam Aadmi Party (AAP) sorkar tashii aruba sülen ita pongu tsüngda par MLA ana tashi Delhi police-i apuba aija tanü Congress-i, tashi nung aliba party-i linük yimtiba nem tenüng menük bener arutsüogo aser Chief Minister Kejriwal-i MLA anapronglaji pusemer, ta ashi.

“Iba ya yimtenren onük kija ka masü. Iba ya Delhi asoshi maksu, yimti tenüng menüktsüogo. Nüburtemi tamang teimla tulu yur party tasen nem vote agüja liasü. Parnoki menden 47 tashi nung takok angu,” ta Delhi Congress tongti otongdar Sharmistha Mukherjee-i ashi.

“Iba kasa sorkari tang nüburtem ashioktsür. Delhi adener alir nüburtemi asenok menütsür, ibaji tejashitsüka lir,” ta Sharmistha Mukherjee-isa ashi.

Yashi Delhi police-i Kondli nungi AAP MLA Manoj Kumar pua liasü aser tanü Congress leniri iba o jembiogo.

June 9 nüa taoba Delhi Law Minister Jitendra Singh Tomar-i tazüngba kulikaket taila amshiba ken o nung police-i pua liasü. Iba sülen Cabinet nungi pa atsüngogo.

Tanü Delhi nung osangbenertem den jembiba mapang Mukherjee-i, Chief Minister Arvind Kejriwal-i par MLA tem pusemer, ta ashi.

Kejriwal indang senti oset temji (MLA tem) taila sentioset liasü ta jungkai adokogo, ta Congress leniri ashi.

“Taoba mapang senior AAP lenir Prashant Bhushan-i item ama candidate tem indang tekümdangtsü o party nem metetdakja liasü. Saka Kejriwal-i ibaji anema jembia liasü. Aji oda süaka tangbo sentioset ajakji taila lir ta asenoki kuli angur,” ta Mukherjee-i ashi.

Ano külen Congress-isa tanü tzünglu sashia arudang kilentzü junga maoba asoshi tebilemtsü kaa jembigo.

Congress-i ashiba agi, AAP-i aniba state sorkar aser BJP-i aniba tentettem tsüngda ama-meliteper aser ibaji ajanga nüburtem timtemteper, ta ashi.

“Tang tashi amalitep mali. State sorkar aser Centre sorkar na kanga mazüngi raratepba ajanga agency temi item kilentzü merüktsü asoshi mapang mangur,” ta Congress lenir Mukherjee-isa ashi.