Jaluki nung exhibition cum sales day mungogo

Dimapur, Aami/June 27 (TYO): Jalukie Town Daily Market Shed nung June 27, 2019 nü Peren Deputy Commissioner aser Chairman Governing ATMA Peren, Sarita Yadav IAS, exhibition cum sales day nung alakteta tejaoker ka ama oa denogo. Iba sentong ya ATMA Peren aser KVK Peren na sentepa ayongzük.
Sentong nung okila Dr. Zeletgai Ndang Dy DAO Peren-i jembi, kong pai rongsen ketsüng nung terenlok bener arutsü atema organic farming aser yokya yokjitsü asoshi tasa dak rangloker jembia liasü.
Yezaho Swu Dy PD, ATMA Peren aser KVK-ia tanü tendak nung aluyimba koda tongtibang iba dak ajemdaker jembia liasü. Local aluyimertem ajungmesotsü atema takok tajung angurtem nem sempet agüja liasü, koba ajanga parnok taküm liyonga aotsü asoshi lenmang tesademba lapoktsütsü aser rongsen ketsüng nunga renloktsü.
Iba sentong ya Hewoto Sema DAO & PD, ATMA Peren lenisüba kübok aka aser Akam Zeliang Dy PD, ATMA Peren-i tepela anküp o jembia liasü, ta DPRO Peren sangdong ka ajanga metetdaktsü.