Plastic Free Nursery ka lapokogo

Dimapur, Aami/June 27 (Agencies): Department of Environment, Forest & Climate Change, Kohima Forest Division-i senotsü teyari agüja Kijumetouma yimtsüng nung yimdaklirtemi Plastic Free Community Nursery ka yangluogo. Iba nursery ya June 27 nü department ketdangsertemi semdanga aoba mapang lapokja liasü.
Sentong tatsüka agiba mapang DFO Kohima, Rongsenlemla Imchen-i, arem wazüka ayutsüba atema yimdaklirtemi teka amteper inyakba atema parnok tenüng asang aser district nung mezüngbuba plastic free community nursery ka yanglutetba atema tenüngsang agütsü. Lai ashiba agi, yimtsüng ka nung plastic free nursery ka takok ngua amenoktetba ajanga department-i khen dang amshiba plastic mamshitsü asoshi nükjidong yur aliba takok ngua inyakyonga aotsü atema jenjang tajung ka tenzüker.
Ranger Pezaneino-i, süngtong tila belenshia atemba aser anepaluba tsütsü tasa balala agüja liasü.
Yimdaklirtemi sü agi yangluba yangkhu nung naro süngtong aser süngjanglijang tapu balala tetong sapling 5000 shi tsünüteter liasü. Taruba anogo ishika tsüngda item süngtongtem atemba maparen inyaktsü, ta ketdangser sangdong ka ajanga metetdaktsü.