Tatar senden nung jembitetba

Lia lia joko asenoka tangar jembishinü aser libaliru ngua akümer asünungji, tatar senden nung nübortemi shimer yokba tatartem ya mena kazütsü yoker masü saka o jembii yoker ta tangatetba tajung kati arudagi. Ibaji talisa tan oagi parliament senden amenba mapang, Nagaland nungi shimer yokba Rajya sabha tatar K.G.Kenye-i mapang tatsüka meshir jembiba mapang, pa o matemdang speaker-i ojang jembiang ta ashiba o langzüka ashidang, Nagaland nungi shimer yokba mezüng Rajya sabha tatar nungi tenzüka tang tashi nung Nagaland MP-temi agiba mapang sükdangra, ghonda ka shia magii alitsü ta ashiba nungji asenok ajak asoshi tebilemdangtsü tuluka lir. K.G.Kenye-i mapang tatsüka agia jembidang, pai Citizenship Amendment Bill melatet dang Northeast state-tem den shisalemsatepmatsüla aser Naga yimten ken o ya yaktasa latettsü merangtsüla ta kanga junga shiogo. Ajisüaka, tanü asenok asoshibo pai jembiba onükji masü saka pai Rajya sabha nung mendenbuba dang 1964 küm nungi tang 2019 küm tashi nung Nagaland nungi yokba Rajya sabha MP-temi tatar senden nung mapang ghonda kata magii alitsü ta metetdaktsübaji asütsü. Aji taoksatsüka aser tamamangtsüka lir, iba jagiang aji angashia Speaker-ia ibaji khen reprangtsüla ta shisem. Atangji, aiben Nagaland nung MP aser MLA shimdang, teshimertemi kechi atema shimer ta asübaji mebilemdanger aser election nung toktepertemia tatar senden nung nübortem asoshi jembitsübo yimdangia marur. Iba jagi, tatar aikati tatar senden nung shilem agitsübaji tongtibang masü amai bilemer, anungji tatar senden nung kena ola madok pei mapang süidaktsür. Atangji, Rajya sabha nung dang masü saka Lok sabha nunga Nagaland nungi yokba MP-tem rongnung shibaisa kechi onük nung mapang kopiga jembia lir ta bushidangnütsüka kümogo. Ashiko, Lok sabha o Rajya sabha na prongla nung Nagaland nungi aoba tatartemi shilem agia jembibajibo minute ishika dang alitsüa akok. Atangji, Nagaland-bo state kümer külenang Lok sabha nunga 1967 küm nungi dang shilem agitet. Idangji mezüng Nagaland nungi Lok sabha MP asütsü yokbaji  Nagaland Nationalist Organisation (NNO) telok nungi Wb.Dr.S.C.Jamir liasü. Iba sülen United Front of Nagaland (UFN) nungi A.Kevichusa, UDF nungi Rano M Shaiza, Indian National Congress nungi Chingwang Konyak, Shikiho Sema, Imchalemba, K.Asungba Sangtam aser NPF nungi W.Wangyuh Konyak, C.M.Chang, Neiphiu Rio aser tang NDPP nungi Tokheho Yepthomi lir. Ano külen Rakya Sabha nungbo 1964 küm nungi Nagaland nungi Melhupra Vero shimteta yokba angur. Pa sülen Kyamo Lotha, T.Aliba Imti, S.C.Jamir, Hokishe Sema, Vizol, C.Apok Jamir, T.R.Zeliang, H.Khekiho Zhimomi aser tang K.G.Kenye nungertem yokba angur. Atangji, nübortemibo Lok sabha tatar shimba nung dang shilem agir saka Rajya Sabha tatar asütsü atemabo MLA -temiang shimer. Ajisüaka, parnok ajakji nübortem asoshi inyaktsü atema nübortemi shimer, anungji kasasa maongka aser khuret lir. Linük nung nübortem asoshi ken o lemtetba maparen nunga Rajya Sabha tatartemi memulungra Lok sabha tatartem kijaibo telemtetba magitetter. Aji oda, shiba südir süang,  tatar sendeni yokbaji nübortem ajak tenüng nung nübortem asoshi jembitsü yoker. Pa mesüra la shimtetba anogo nungi nübortemibo parnok asoshi tatar senden nung parnok nüngdak jembitsütsü aser tatar senden temer alii alua nübortem asoshi mapa tajung inyakba nung lenisüba tajung agütsütsü imlar. Tanü asenoka tatar senden nung nübortem asoshi tebilemba ken o benoka jembitsü nüngdakba indang lemsatep dang, West Bengal nungi tang mezüng adokla Trinamool Congress M.P Wt.Mahua Moitra-i Modi-i aniba BJP government aija sashisashia aser züngzünga jembibaji jangratemtsüka aser tenükshitsüka angur. Atangji, tatar ka asoshi tatar senden nung o jembitsübaji Ruling nung alidangang tajungba aser ano opposition nung alidangsa tajungba ta nübortem asoshi jembitsübaji teti tongtibang lir.