Kashmir timtem ya Jawarharlal Nehru ajanga lir: Amit Shah

New Delhi, June 28 (Agencies): Congress Party aija Hokolbarnü Union Home Minister, Amit Shah-i, India nungeri Jammu & Kashmir shilem asemsü nungi shilem ka takoksa angubaji Congress-i aibelenba ajanga lir, ta tai tongloktsü.
Tanü Lok Sabha nung Jammu & Kashmir nung President’s Rule ita trok atsülangtsü atema benoka jembidang Shah-i, Pakistan occupied Kashmir (PoK) ya India shilem ka süla, ta ashi.
Tang Kashmir tensa majungba ya linük nung mezüngbuba Ato kilonser, Jawaharlal Nehru tai ajanga lir, kechiyong iba mapang nungji pai ceasefire benok, ta ashi.
Paisa, “Pakistan nem iba li (PoK) agütsübaji Jawaharlal Nehru ajanga lir. Iba mapang nungji Nehru-i taoba Home Minister o manga. Anungji Manish (Tewari), nai onok dang putiotsü nung tesayuba magütsütsüla,” ta ashi.
NDA-i aniba sorkari Pakistan nung kiralongra tera anema inyaktsü, ta shia Shah-i, surgical aser air strikes tu India nunger defence atema inyak, ta ashi. “Narendra Modi sorkari kiralongra anema inyaker aser asen sensotem teyari ajanga nükjidong ataloktsü,” ta pai ashi.
Congress maneni aija Shah-i, tang tashi nung Arrla 356 (President’s Rule) 132 ben benokogo, aser iba nungjagi state sorkar anentsütsü atema Congress-i iba Arrla 93 ben amshi, ta metetdaktsü.
Paisa, state nung sorkari nisung 919 indang security agienogo, kechiyong security amokmeren maliasü, ta ashi.