Congress-i tamakok anguba kuli agia ni anener: Rahul

New Delhi, June 28 (Agencies): Congress Tir, Rahul Gandhi-i maneni Tir menden nungi anisüngzüktsü metetdakja, “Lok Sabha election nung party-i tamakok anguba kuliji ni agia sodi meshir, aser iba nungjagi matsüngshitsü,” ta metetdaktsüogo.
Haryana state coordination committee-i pa dang maneni party Tir inyaktsü aser sodi meshiba shidi meyipa agitsü mepishidang pai iba oji langzü.
Pai Haryana nungi Congress lenirtem dang, “Lok Sabha election nung party-i tamakok anguba kuliji ni agir. Ni tangar dang menden nungi anenang ta mashitsü. Parnokia tamakok anguba kuli agia anentsüji pei melung,” ta ashi.
Haryana nung Lok Sabha menden 10 lir aser tawa election nung Congress-i menden ka nungdanga takok mangu. Haryana Congress nung Tirji Ashok Tanwar lir, aser pa kümsük tatembanglen kati aruyonga pai Tir menden nungi manener.
Taküm küm tatemlen Haryana assembly elections dak sendakba nung tasüngdangba ka langzüdang Rahul Gandhi-i, election atema asalentongji nenoki yanglutsüla, ta langzü.
Iba senden nung Congress general secretary in-charge, Ghulam Nabi Azad, taoba mapang Haryana Chief Minister, Bhupinder Singh Hooda aser Tanwar nunger densema liasü.
Senden nung Haryana CLP lenir Kiran Choudhry, MLA aser otongdar Randeep Surjewala aser Kuldeep Bishnoi nungerbo maden.
Bodhbarnüa UPA chairperson aser tetsü, Sonia Gandhi lia Rahul-i party nungi Lok Sabha züngsemtem dang, pai Tir menden nungi anenogo, anungji pa Congress Tir masü, ta jembia liasü. Paisa, Congress Working Committee-i Tir tasen ka shimtsüla, ta metetdaktsü.