Arunachal Lokayukta mendenbuba inyaktsü atema P.K. Saikia shim

Itanagar, June 28 (Agencies): Arunachal Pradesh sorkari Brihostibarnü state Lokayukta tentetogo aser mendenbuba inyaktsü atema Gauhati High Court nung taoba judge Justice P.K. Saikia shim.
Raj Bhavan, Itanagar nung aliba Darbar Hall nung Justice P.K. Saikia-i Arunachal Pradesh indang state Lokayukta chairman inyaktsü atema tezüngzüktep agi.
Maneni, taoba IAS ketdangser Yeshi Tsering-i state Lokayukta nung züngsem ka ama tezüngzüktep agia liasü.
Arunachal Pradesh governor Brig (Retd) B. D. Mishra-i Saikia aser Tsering na nem tezüngzüktep agidaktsü.
Sentong nung Governor kinungtsü Neelam Misra, chief minister Pema Khandu, deputy chief minister Chowna Mein, cabinet minister tem, taoba chief minister Nabum Tuki aser sorkar tongti ketdangsertem aden.
Arunachal Pradesh Assembly-i March 4, 2014 nung Lokayukta Bill agizüka liasü.
“Arunachal-i ochimashi anema raraba nung otsüsütsü anogo ka. Justice Prasanta Kumar Saikia Ji (retd) aser Yeshi Tsering Ji IAS (retd) na den tepela lemsateper” ta chief minister Pema Khandu-i Saikia aser Tsering na nem tenüngsang agütsü.