NDPP-i ILP & BEFR 1873 osang jangjatsür

Dimapur, June 28 (TYO): Ashwini Kumar Upadhaya ta ser nisung kati PIL benokba sülen osangkakettem nung ILP aser BEFR 1873 dak sendakba osangtem prokshia arudar. Ajisüaka, NDPP-i aniba PDA sorkari nübortem temeten kümzüka ayutsü nangzükba nung masetshii noktaka lir aser Naga yimten latettsü atema yariteptsü, ta NDPP-i metetdaktsü.
Citizenship (Amendment) Bill 2016 ajanga Nagaland ajungalen ILP aser BEFR 1873 ozüng benoktsü atema atema Nagaland nung alirtemi ola adok aser iba atema Abhishek Singh Committee tenteta mapa nungloktsü, ta NDPP-isa ashi.
Civil society aser NGO temi ashiba ama state sorkari January 31, 2019 nü Rhododendron Hall, Chumukedima nung senden ka ayonga amen aser idangji Dimapur dena state ajungalen ILP ozüng benoktsü telemtetba agi. Iba nung ajemdaker February 15, 2019 nü state cabinet-i Dimapur densema Nagalang ajungalen ILP amshitsü lemtet aser Abhishek Singh Committee-i agütsüba report agizüka ayu, ta NDPP-isa metetdaktsü.
State sorkari Dimapur nung non-Naga nunger anema inyakba kecha mali. Dimapur dak alaka Nagaland ajungalen ILP ozüng benoka liaka, non-Naga nunger aika Naga nunger den putepa aser tesünep nung dang liyonga arudar. ILP ajanga India senso indang temetentem ajembang mayur mesüra non-Naga nunger menoktanger. ILP benokba ajanga non-Naga nunger shishilembartem mapa meinyaktettsü ta asübaji khenyongi tai lir. Maneni, Abhishek Singh Committee indang report nung non-Naga nunger dena tangar ajak kümzüka ayutsü lateta lir, ta NDPP-i ashi.
Dimapur ya Naga Hills nung tongti shilem ka liasü anungji Dimapur ya Assam indang shilem ka asütsü kuli kecha mali. Anungji NDPP-i nisung aser teloktem dang PIL ya tekaratiba nung angatetteptsü atema mapa inyaktsü ayongzüker. Dimapur nung dang masü saka Nagaland nung non-Naga permanent residents-ia Naga nunger temeten, maongka aser maitsü kümzüka ayuba mapa posema nungittsü ayongzüker, ta NDPP Media & Communication Committee-i metetdaktsü.