Sorkar school tem nung ‘quality education’ nüngdaker

Kohima, June 28 (TYO): Sorkar school tem nung tang nüngdakbaji quality education lir anungji tesayurtem dak loktiliba nem meyipa agütsütsü temolungtetba alitsüla ta School Education Advisor, MLA K T Sukhalu-i tanü ashi.
Kohima College nung Nagaland Sarva Shiksha Abhiyan Teachers’ Association (NSSATA) indang lokti mungdang nung o jembidang K T Sukhalu-i sorkar school tem nung shisaliok jenjang tajungba kümdaktsütsü ayongzük.
Reprangdangra, elementary section nung tazüngertem mali saka tesayurtem nem itasen maneni agütsür, iba ya tai lir, ta Advisor-isa ashi.
Maneni, proxy teachers ayuba inyakyim ya tesempatsüka anungji tesayurtem, village council tem aser lennirtemi pei telongtet nung iba inyakyim noktangtsüla ta paisa shisem.
RMSA aser SSA tesayurtem indang olen ka ashidang K T Sukhalu-i “iba tebilemtsü atema mapa inyakdar anungji aremzüka atatsüla” ta metetdaktsü.
Sentong nung School Education Principal Secretary Menukhol John-ia o jembidang “education sector nung telemsa adokba angudang temolung raksar, anungji tesayurtem longjemer khurettem koktettsüla” ta ashi.
School Education Director, Wuthungo Tsopoe-ia tesayurtem dang “nenok tesayur inyakba ya ajungbena mesüra maongka ka ngua inyakerba masü saka nenok sasa shimer inyakba mapa ka lir. Nenoki loktiliba nung temelenshi bener arutsü ta nangzüker iba mapa inyaker, anungji kanga dang süoki ia bilema aser temolung agüja mapa inyaktsüla” ta ayongzük.
Iba sentong nung NSSATA president, Penthungo Y Yanthan-i tesayurtem nem tenangzükba agidaktsü.
Iba mapang tesayurtemi quality education agütsütsü aser kaketshirtem atema tatishitsü akaba taküm ka ka ama alitsü aser mapa inyaktsü nangzük.
Sentong nung Ebenezer Baptist Church Kohima pastor Rev Keviyiekielie Linyü-i tesayurtem atema temoatsü meshia sarasadem aser Don Bosco College Kohima principal Fr Dr P Suresh-i tayongzüba o jembi.