Ramdev-i nashi tepsetba nokdangtsü ayongmesor

Jodhpur, September 16 (Agencies): State kar nung nashi tepsetba nokdangba ajanga mangatettep aliba mapang ka nung Bodhbar nü yoga tesayur, Baba Ramdev-i, linük ajunga nung nashi tepsetba memelatsü atema benokba den külemi nashi ya “National shiruru” jenjang agüjang ta khangogo.
Jodhpur nung osangbenertem den jembidang Ramdev-i, “Linük nung nashi tepsetba ya nokdangtsüla aser National shiruru ta sangdongtsüla,” ta ashi.
Anogo asemnü BSF ketdangser aser parnok kibongtem dang yoga sayutsü atema Ramdev Jodhpur-i oa liasü, aser iba sentongji tanü tembangogo.
Linük nung mozü mamshii tsünütetba aluyimba (organic farming) kanga nüngdak ta shia Ramdev-i, “Tsünüsempongtsü nung mozü kanga amshitepba ajanga linük nung cancer tali adokdaktsüba dang masü saka ali temo-a samadaktsür,” ta ashi.
“Ano külen mozü mamshii tsünütetba tsünüsempongtsütemji temang atema ajungba dang masü saka ali temo atema-a tajung,” ta pai ashi.
Ayurveda aser local mozü dak sentakba nung Ramdev-i, “Taruba küm pongu tsüngda linük tesem ajak nung tashitak aika atema Ayurveda mozü angutsüsa onoki inyaktsü, aser pharma MNC’s mozütem linük toktsütsü,” ta ashi.