NBSE-i 2018 küm examinations balala jenjang asadang

Kohima, Chiteni/July 01 (TYO): Nagaland state-i 2013 küm nungi tenzüka Engineering Courses atema All India Joint Entrance Examination JEE (Main) agir aser 2017 küm Medical Courses atema National Eligibility cum Entrance Test (NEET) agia liasü; iba dak alia State quota nung Agri aser allied courses atema shimtsü asoshi Nagaland Board of School Education (NBSE)-i Nagaland State Entrance Examination (NSEE) agia arudar, ta ketdangsertem osang ka ajanga metetdaktsü.
Shisaliok rejutem nem parnoki inyaktetba aser 2018 küm JEE (Main), NEET aser NSEE entrance examinations nung NBSE kaketshirtemi inyaktetba metetdaktsütsü atema Board-i State quota kübok menden anguba kaketshirtem aser institutions asadanga liasü, aser ibaji ajanga NBSE kübok HSSLC Examination nung takok angur kaketshirtemi state quota nung menden 237 nungi menden 187 tashi angu, ta bushitetogo.
“Asen kaketshirtemi entrance examinations- JEE (Main), NEET aser NSEE nung junga inyaktetbaji tenüngsang agütsütsü tetemsü. Science Stream atema tongti syllabus 2011 küm tenzük aser class takdang nung syllabus melenshiba ajanga iba ama takok tajung angur asütsüa akok ta bilemer,” ta kasa osang ajanga ametetdaktsü.
Board-isa reju balala nung tekolakpurtem, talisa subject teachers-i kaketshirtem mangdang atalokdaktsüba atema pelar.
2018 küm state quota kübok course balala atema menden anguba reju aser kaketshirtem züngdangba teküboklen agüja lir. Boards aser institutions tenüngtemji Board indang website (www.nbsenagaland.com) nung agüja lir.
Iba data ya Directorate of Technical Education, Nagaland, Kohima nungi angu.