Yimtsüng toktsür jilai aoba anendaktsütsüla

Kohima, July 1 (TYO): Rural Development Department indang Performance Review Meeting ka tanü RD Conference Hall nung menogo. Sendenji RD Director, Imlimeren Jamir menden ser amen.
RD principal secretary Bendangkokba IAS-i o jembidang nisungtemi rural toktsür urban sector-i aoba ajanga rural nütsüng yongsük kanga ajema kümogo ta ashi.
Yimtsüng tia nung alirtem nütsüng tajemba akümba agi yimtsüngtem nung mapa inyaker ajema kümogo aser küm 7-10 tashi tekong lu ayimba nungi küm 10-15 melenogo, ta Bendangkokba-i ashi.
Yimtsüng tia nung alirtemi jila bushia oa aliba sottsü atema MGNREGA, GIA aser RSETI (NRLM) ama maparentem tajungba nung inyaktsü nüngdaker. Item maparen ajanga yimtsüng tia nung aliba lanurtem nem senotsü teyari agütsütettsü, ta paisa ayongzük.
GIA kübok yimtsüng tia nung aliba lanurtem yaritsü atema corpus fund ka tentettsüla aser aluyimertem nem senotsü teyari agütsütsüla. Maneni, MGNREGA kübok block ajak nung wholesale markets lapoktsüla, ta Bendangkokba-isa tebilemba lemsatep.
Paisa district aser block ajak dang July 15, 2019 tashi nung Direct Benefit Transfer (DBT) indang progress report agütsütsü aser July 31, 2019 tashi nung program ajak indang geo-tagging report yanglutsü atema tetuyuba agütsü.
July 25, 2019 tashi nung ketdangser ajaki audit para, GIA kübok Success Stories aser Utilization Certificate agütsütsü atema Principal Secretary-isa tetuyuba agütsü.
Tanü amenba senden nung MGNREGA, GIA/MCG/VDB Welfare fund, RGSA aser PMAY (G) onüktem benoka jembitep.