PMAY ochishia inyaktsü asoshi JDU Nagaland-i ayongzüker

Kohima, Chiteni/July 02, 2019 (TYO): June 2015 küm National Democratic Alliance (NDA) sorkar kübok jila aser yimtsüng naprongla atema Prime Minister Awas Yojna (PMAY) scheme tajung lapoktsüba atema pela jembiba mapang, Janata Dal United (JDU) Nagaland-i June 01, 2019 Hombarnü, PMAY achaayanger department ketdangser dang iba programme ochishia aser tim nung inyaktsü asoshi tekümdangtsü agüja liasü.
JDU Nagaland-i ashiba agi, tajangzükertem nungi sen nungi shilem ka meshiba aser tashiyim agi akangba osangtem angashiogo. Iba den bendenloksema, beneficiaries-i teyangludak aser yanglumar aliba kisü jensütem asoshi noksa tangoktsü mapa nüngloktsür photographer temi noksa tangoktsü atema senotsü akhangba osang anagazüka lir, ta JDU Nagaland-isa shisem.
Item masüba inyakyim dak alai, tajangzük angutsüpur tejangja nisungtem nem tim tagütsütsü aliba magütsüba osangtem-a angazükogo, ta JDU Nagaland metetdaktsü.
Ibayongji PMAY achaayanger tim ketdangsertemi inquiry committee temeja ka amenoktsü asoshi JDU Nagaland-i mepishia liasü. Ajiasünungang, beneficiaries dang nungi tim mesüi sen meshizüka agiba aser akhangba inyakyimtem bushitettsü.
“Iba dak alia, PMAY scheme ya department kübok tejangja nisungtemi angur asü mangur mesüra tangar kar tenüng amer tom nung sen meshizüka agiba inyakyimtem committee-isa asüngdanyatsüla aser achaayangtsüla,” ta JDU Nagaland-i metetdakja liasü.
Maneni, sen nungi shilem ka akhangba inyakyimtem entertain masütsüla aser iba ama ochimashi inyakyim tem angazükra mobile numbers- 9436013273/8837482416 ajanga party dang osang metetdaktsütsü asoshi JDU-i beneficiaries dang ajungshia liasü.
JDU-isa, sen nungi shilem ka khanga agiba nisungtem dang item sen meyipa agütsütsüla mesüra ozüng agi melaba ama tapet temerenshi agütsü, ta media aser osang kaket ajanga tekümdangtsü agütsüogo.