DNSU aser DATS-i moko mita ao

Dimapur, July 2 (TYO): Dimapur Naga Students’ Union (DNSU)-i District Anti-Tobacco Squad (DATS) den külemi moko ayokba dokan aika mita ogo.
July 2, 2019 nü DMC Dumping Site, Sunrise Colony, Burma Camp nung moko ajak raksa endokogo, ta District Anti-Tobacco Squad Member aser DNSU indang Secretary Education & Statistics Tenyebinlo Himb-i ashi.
Moko rongdokdang Assistant Commissioner of Police (ACP) HQ, Dimapur T. Tsenpemo Kikon, District Anti-Tobacco Squad (DATS) Team Leader Er. Rhonbemo Kikon, MT Inspector aser DNSU ketdangsertem liasü.
Moko dak sendakba osang aika ashiba nung ajemdaker DATS aser DNSU-i dokantem mita aodang sen lakh 2 jenjang moko apu.
Arishi küm 18 teküpok dang moko ayoktsü ozüngi memelar aser shisaliok reju telongtet feet 300 nung moko ayoktsü memelar.
ACP T. Tsenpemo Kikon aser DATS Team Leader nati DNSU dang pelaba metetdaktsü.
DATS aser DNSU-i Dimapur kübok yimtsüng aser colony balala nung Chairman aser lennirtem dang COTPA Act 2013 mapa inyakba nung yariteptsü mepishia metetdaktsü.