Rio-i Mountain View Christian College campus tasen lapoktsü

July 2, 2019 nü Nerhe Phezha nung Chief Minister Neiphiu Rio, Higher & Technical Education Minister Temjen Imna Along Longkumer aser ketdangsertem Mountain View Christian College  campus tasen lapokdang agiba noksa angur. 

Dimapur, July 2 (TYO): Nagaland Chief Minister Neiphiu Rio-i tanü Nerhe Phezha nung Mountain View Christian College indang campus tasen lapoktsüogo.
Mountain View Christian College ya 1991 küm Rev. Dr. Tseibou Rutsa menden ser lapokba college ka lir.
Iba campus tasen lapokba sülen Keyake (BSF Camp) Kohima nungi Nerhe Pezha-i college belentsü.
Mountain View Christian College ya Nagaland University kübok lir saka autonomous akümtsü alizüng lir. Iba college yagi subject balala nung degree course tem agütsür aser college indang tongti alizüngji kaketshirtem nem Khristan tesayubatem agütsütsüba lir.
Tang iba college ya Educational Visionary Forum aser management board kati repranger. Board nung Chairman ji Lithrongla T. Rutsa lir.
Iba campus tasen lapokba atema kanga pelar aser Educational Visionary forum-i loktiliba asoshi mapa tajung inyakba atema tenüngsang agütsür ta Neiphiu Rio-i o jembidang ashi.
Iba campus tasen ya kanga tapet lir aser künü anogo Nagaland nung ‘centre of excellence & learning’ akümtsü imlar, ta paisa ashi.
Nagaland nung zünger mapa mangur jenti lir aser linük nung unemployed youths teimba alibaji asen state lir. Anungji, Nagaland nung college temi kaketshirtem tangar teyari magii liteta aotsü aser private sector nung inyaktsü indang tesayubatem agütsütsükla, ta Rio-isa metetdaktsü.
Pais kaketshirtem dang meranga azüngtsü, tashi angatsü aser bendanga agüja inyaktsü atema ayongzük.
Ali kiburtemi college atema molungsoa ali tenlaba atema Rio-isa pelaba ashi aser yimdaklirtem dang college yaritsü mepishi.
Chief minister-isa college administration dang sorkari college yaritsü molunga lir ta shisem.
Sentong nung Higher & Technical Education Minister, Temjen Imna Along Longkumer-ia o jembidang Educational Visionary Forum nem tenüngsang agütsü.
Nagaland nung public tentet kati iba ama mapa tajung inyakba ya kangabo majangshir aser Nagaland tajungba kümdaktsütsü atema tanga teloktemi iba ama mapa tajung inyakdaktsünür ta Imna Along-i ashi.
Nerhe Phezha nung Mountain View Christian College indang Campus tasen lapokba ajanga Chiephobozou sub division nung alirtem ajangzüktsü, kechiyong iba tesem nung iba College ya mezüngbuba lir.