Sikkim-i July 7 nü ‘A Day for Mother Earth’ amungtsü

Gangtok, July 3 (Agencies): Sikkim-i alima nem anogo ka bendanga agütsütsü telemtetba agiogo aser iba anogo nung lipoküm dak sendakba sentong balala ayonga agitsü.
Sikkim sorkari küm shia July 7 nü ‘A Day for Mother Earth’ ta ser amungtsü telemtetba agiogo.
Iba anogo ya linük nung Van Mahotsav Week amungba tatembang anogo lir. Van Mahotsav ya July 1 nungi 7 tashi amunger.
Gangtok nung aliba Forest Secretariat nung osangbener den jembidang Forests, Environment & Wildlife Management Department Minister Karma Loday Bhutia-i ashiba agi “Sikkim sorkari July 7 ‘A Day for Mother Earth’ ta ser küm shia amungtsü telemtetba agi.”
Iba anogo ya state sorkari küm shia amungtsü aser alima tatsükba küma aoba khuret asoshi sentong balala ayonga agitsü, ta paisa ashi.
July 7 anepdang 11:00 ako nungi tenzüker minute 7 tashi Sikkim nung ‘No Vehicle Plying’ ayonga agitsü telemtetba agiogo, ta Minister Karma-isa metetdaktsü.
Gari nungi adokba mokozü ajanga carbon monoxide, carbon dioxide, sulphur aser nitrogen oxides adokba ajanga alima mopung menentsür, ta paisa shisem.
Iba anogo amungba ya Nationally Determined Contributions and Sustainable Development Goals nung yariteptsü atema lir, ta Minister-i ashi.
Paisa Sikkim nung alir ajaki sorkari tenzükba mapa nung yariteptsü atema mepishia metetdaktsü.