Bendanglen India nunger 8,189 tepoukdak balala nung lir: MEA

New Delhi, July 03 (Agencies): Bendang linük balala nung India nunger 8,189 tepoukdak balala nung lir, aser parnok rongnung timbaka Saudi Arabia linük nung lir, ta tanü External Affairs Ministry-i metetdaktsü.
Lok Sabha nung tasüngdangba ka langzüdang Minister of state for external affairs, V Muraleedharan-i, Gulf Cooperation Council züngsem linük trok kija nunga India nunger 4,206 tepuokdak lir, ta metetdaktsü.
Saudi Arabia nung India nunger 1,811 tashi tepoukdak balala nung lir, iba sülen UAE nung 1,392 lir, ta Minister-i metetdaktsü.
GCC ya Middle East linük trok- Saudi Arabia, Kuwait, United Arab Emirates, Qatar, Bahrain aser Oman indang yimtenren aser rongsenkettsüng indang teloktep ka lir.
Muraleedharan-i, 2011 küm India aser UAE nati Transfer of Sentenced Persons tezüngzüktep agia liasü aser 2013 küm March ita nungi mapa küma inyaker, ta metetdaktsü.
“Iba tezüngzüktep kübok linük anati tepoukdak alirtem chiokteptsü, ajisüaka tang tashi UAE sorkari India nunger tepoukdak alir ka danga chioka mali,” ta Minister-isa ashi.
2018 küm October ita nung Dubai nung Consulate General of India-i iba tezüngzüktep kübok India nunger 77 chioktsü aser parnokji India nung aliba tepoukdak ayutsü atema mepishia liasü, aser Transfer of Sentenced Persons tezüngzüktep kübok UAE-i iba temepishibaji shisadangdar, ta paisa shisem.
Ano tanga tasüngdangba ka langzüdang Muraleedharan-i 2016 küm nungi tenzüka taküm March 31 tashi nung linük 125 nungi India nunger tasümang/mitsü 14,312 bener aruogo, ta metetdaktsü.