Maharashtra: Tiware Dam pokdangba ajanga nisung 23 asü

New Delhi/Ratnagiri , July 03 (Agencies): Maharashtra state kübok tzüyimkümlen aliba Konkan region nung tzü-tepdang ka pokdangba lendong nung nisung 23 shi süogo aser aika samaogo, ta tanü osang ka ajanga metetdaktsü.
Tzünglu tali aruba ajanga tzü tepdang nungji tzü tali metsünga tzütepdangji pokdanger yimdoka tsünglanglen aliba yim aika nung tzü metsüng, ta police-i metetdaktsü.
Iba lendong nung nisung 23 shi asü aser tasümang 11 bo nguogo.
Tzünglu tali aruba ajanga Mongolbar aonung Ratnagiri district kübok aliba Tiware tzütepdangji pokdang, ta district ketdangser kati metetdaktsü.
Tzü tepdang pokdangba ajanga tsünglanglen aliba yim tenet nung tzü tali metsüng aser ki 12 bo tzü agi ponger oadokogo.
Osangbenertemi phone ajanga metetpeladang Additional Superintendent of Police, Ratnagiri, Vishal Gaikwad-i, National Disaster Response Force (NDRF) aser state police senteper nisung bushiba operation tenzükogo, ta metetdaktsü.
“Police-i yimdaklirtemji aienshidaktsügo. Tangbo tensa azüoktetogo,” ta police ketdangserisa metetdaktsü.
Ano tanga police ketdangser kati, ayaterm nung iba lendong atalokba ajanga nisung kümzükba aser bushiba maparen nung tetsükdaktsü ajurua liasü, ta ashi.
Ano district nung lenirtemibo, state sorkar dang iba tzü tepdanga anepalua yanglushitsü aiben mepishiogo, ajisüaka sorkari kecha meinyakba agi tang iba lendong ataloker, ta tai tongloktsügo.
Lenirtemi ashiba agi, parnoki district administration dang Tiware tzü tepdang nung tekaksa aliba indang osang metetdakja sorkar dang ibaji yanglushitsü atema metetdakjang ta mepishi, ajisüaka parnoki kecha meinyak.
Maharashtra Water Resources Minister, Girish Mahajan-ia, iba tesem anasa alirtemi Tiware dam nung tekaksa aliba osangji metetdaktsür liasü, ta ashi.