KMSS advisor Akhil Gogoi-i Centre aitsür

Guwahati, July 2 (Agencies): Bharatiya Janata Party (BJP)-i aniba Centre sorkari Assam nung tzümetsüng tensa ‘national calamity’ ta mesangdongba atema Krishak Mukti Sangram Samiti (KMSS) advisor Akhil Gogoi-i aitsüogo.
Guwahati nung osangbener senden ka nung jembidang “July 1, 2019 nü Union Minister for Jal Shakti Rattan Lal Kataria-i Assam nung tzümetsüng tia ya ‘national calamity’ ta sangdongtsü magizükba atema sasa bilemtsür” ta Gogoi-i ashi.
“Congress-i sorkar yimsü asüdang nungi Northeast India senzüka yutsür. Kataria-i Parliament nung jembiba ajanga sorkari Northeast India indang khurettem atema mebilemtsür ta sayur. Centre sorkari tzümetsüng ya ‘national disaster’ ka ta sangdongtsüla” ta Gogoi-isa shisem.
“Northeast India atema tongtipang ayong Brahmaputra ponglang tutoktsü ta BJP-i jembiba tu 17 buba parliamentary election nung takok angutsü atema jembiba dang liasü aser parnoki iba tiyazü ajanga takok nguogo” ta paisa metetdaktsü.