Murray aser Serena na külemi asayatsü

Chiteni/july 3, 2019 (Agencies): Andy Murray aser Serena Williams na Wimbledon nung tarep temeyoktep asayatsü jangjaogo, ta Murray achaayangertemi Mongolbarnü metetdaktsü.
Murray shiba surgery agiba sülen tang tanem tanemi asayai aitsü merangdar pa Williams den külemi tarep temeyoktep asayatsü.
Pa Wimbledon nung tebur tarep asaya nung France nunger asayar Pierre-Hugues Herbert den külemi asayatsü jangjaogo.
“Court nung küna kanga mesüktepa asayar aser ni pa dak iba ya kanga nükshia liasü,” ta Williams-i ashi.
Murray, tarep temeyoktep asayatsü atema partner ka bushia liasü saka asayar aikati pa magizük ta shia liasü.
“Ni asayaner. Onoki asayar kar den sensaksemogo. Ni asayatsü sentong lir. Ni tebur tarep asayar kar den parnok kechiba tarep temeyoktep masayar ya asüngdangogo aser parnok asoshi tarep temeyoktep asayatsü ya tongtibangtiba masü,” ta Murray-i ashi.
2006 küm Wimbledon nung Murray Kirsten Flipkens den tarep temeyoktep asayaogo aser iba mapang tanabuba round tonga asayaa liasü.
Paisa, 2012 London Olympics nung Laura Robson den silver medal koktetogo.
Serena ya Slam nung tarep temeyoktep anaben tashi koker aliba asayar ka lir.
1998 küm lai Max Mirnyi den külemi Wimbledon aser US Open kokogo.