Congress atema tebilemtsü

Taküm Lok Sabha elections agiba sülen Rahul Gandhi-i Indian National Congress (INC) president menden toktsütsü atema jembia arur yashi pai tir menden toktsüogo. Lok Sabha elections nung Congress-i tamakok tulu angu aser iba indang tebilemtsü pai abener ta shia Rahul-i tir menden toktsü. Rahul-isa Congress Working Committee (CWC) senden ka tekaratiba nung mener taruba tir shimtsü atema ayongzük. Paisa taruba INC tirji Nehru-Gandhi kibong nungi masütsüla ta shiogo. Lok Sabha elections nung tamakok anguba sülen May 25, 2019 nü ayonga amenba CWC senden nung Rahul-i tir menden toktsütsü atema mezüng osang sangoktsü. Idangji CWC-i Rahul tebilemba magizük saka pai iba telemtetba nungi masetshir ta shiyonga aru.  Congress lennir tejentemi Rahul Gandhi mesüzüktsü merangdangogo saka parnoki pa mokoktet. Taoba mapang Congress-i sorkar kümteta aliba state tem nungi chief minister temia pa mesüzüktsü merang saka makok. Rajasthan Chief Minister Ashok Gehlot aser Madhya Pradesh Chief Minister Kamal Nath nati Prime Minister Narendra Modi-i election maparen nung tim mesüi inyak ta shia Rahul Gandhi mesüzüktsü merang saka idangji Rahul-i tena dang party-i takok tajung angutsü ta imlaba Madhya Pradesh, Rajasthan aser Chhattisgarh state asem nung Congress-i tamakok angu ta langzüa liasü. Yashi Rahul-i züluba shidi nung Congress-i election nung tamakok anguba atema pai tebilemtsü abener aser asen party tarutsü atema tebilemtsü abentsübaji kanga tongtipang ta shia lir. “Mapang kar nungbo kü kija dang liasü aser iba atema ni nüma atanger” ta paisa shidi nung shia lir. Iba shidi agütsüba sülen Congress lennirtemi Rahul dang shidiji meyipa agitsü atema mepishitsü tenzükogo, saka pai pa indang Twitter profile nungi Congress president ta asüba agienogo. Rahul-i tir menden yutsüba ajanga Congress atema tebilemtsü tulu ka ajuruogo aser iba khuret koktettsü atema Congress Working Committee-i senden ka ayonga amentsüla. Rahul-i züluba shidi magizüktsü atema CWC dak tashi mali aser külen Rahul-i kechi südir menden toktsür ta tekong meranga noktaker asü nung, parnoki shidiji agizüktsüsa akümtsü. Yamaji süra, CWC-i Congress party atema interim president ka shimtsü akok aser iba interim president jagi Congress president shimtsü atema election maparen tenzüktsü. Saka, CWC-i Congress president shimtsü atema elections magii atatsü tebilemba lira, party len anir oya atatsü atema parnoki lennir telok ka shimtsü akok. Taoba küm ishika India nung political party tejentiba Indian National Congress (INC) tashi maitba küma arur aser linük ajungalen parnok tera yanga state aika nung sorkar yimsü süyonga aruba, tanübo state kar nung dang parnok sorkar kümteta lir. Yashi Rahul-i züluba shidi nungji Congress lennirtemi shisadangtsü indang onük aika dena lir aser pai ashiba ama akhi ama party tashi itta kümdaktsünüra, tangar dak tai metongtsüi pei sasa tebilemtsü abentsü nüngdaker ama ajiteter. Tanü nungi tenzüker linük nung sensotemi Congress dak tenük yoka reprangdar anungji lennirtemi kanga dang shisa kaa telemtetba tajung ka agitsüla. Atangji, Congress-i tebilemtsü tulu ka ajurua lir aser iba ya koktettsü tasak asütsü.