NRC nung madenba Hindu nunger nem India senso agütsütsü: Amit Shah

Guwahati, July 3 (Agencies): Assam nung National Register of Citizens (NRC) adoktsü atema anogo ishika dang lia Union Home Minister Amit Shah-i “Parliament nung “Hindus refugees” nem senso agütsütsü atema sorkari bill ka benoktsü” ta tanü metetdaktsü.
NRC nung madenba Hindu nunger asoshi iba bill ji yanglutsü, ta pai ashi.
Rajya Sabha nung Trinamool Congress (TMC) züngsem Derek O’Brien-i asüngdangba langzüdang “Sorkari NRC ya yanglutsüla ta ashir. Ozüng alema aruba anendaktsünür. Hindu refugee tem atema onoki Citizenship (Amendment) Bill ajanga parnok nem India senso agütsünür” ta Amit Shah-i ashi.
2019 election manifesto nung Bharatiya Janata Party (BJP)-i linük nung NRC tem yanglutsü aser CAB mapa küma inyaktsü ta nangzüka lir.
Northeast state tem nungi ola adokaka Centre-i Lok Sabha nung Citizenship Amendment Bill, 2019 benoka agizük saka Rajya Sabha nung magizükba ajanga iba Bill mapang süi.
Citizenship Bill ya 2016 küm Lok Sabha nung Citizenship Act, 1955 yanglushitsü atema benoka liasü.
Iba bill ajanga Citizenship Act, 1955 yanglushitsü aser Afghanistan, Bangladesh o Pakistan linüktem nungi aruba Hindu, Sikh, Buddhist, Jain, Parsi aser Christian nunger nem India senso agütsütsü.