Kidanger Tsüngsü Nung

Kidanger state, Assam tsüngsü nung anidaker mesüka Nagaland nunga Register of Indigenous Inhabitants of Nagaland (RIIN) atema maparen tenzüktsü. Nagaland densema northeast state temi Assam nung National Register of Citizens (NRC) inyakyim repranga atadar aser ano iba maparen merenemi alidang asen state nungbo taküm December 10 tashi nung iba maparen renemtsü sentong lir. RIIM ya July 10 nungi tenzüka ita ana tsüngda (anogo 60) Nagaland nung lisopurtem (indigenous) tenüng list asüba maparen renemtsü imlar aser iba sülen ashishitsü/objection atema October 10 tashi anogo züngzüktsütsü. Anogo 60 tsüngda iba maparen renemtsü, ta atemzükba yabo melamela atemzük ama bilemer, saka takoktsü lenmanga lir amai bilemer, kechiyong state ana nütsüng yongsük medemdangra Assam dang nungibo Nagaland nung alir nütsüng kanga agi ishiba. Assam nung ozüng alema arua alir nisung lakh 40 shi NRC list nung mezüngok. Nagaland nunga lisopurtemi tribal masüba nisungtem aser tzümartem jangjatsü atema aiben meranger aser karbo Bangladesh nungi ozüng alema arua alirtem ta züngshir. Joko asen lima nung bendanger nütsüng tali arenba agi yimtsüng aser jila sasep nung aikati ozüng alema arur bendangertem nem ki para magütsütsü aser shishilembaba maparen-a meinyakdaktsütsü atema inyaka arudar. Nagaland sorkari RIIN atema telemtetba agiba sülen yimtenren party tem, lokti tentet balala aser tribal tentettemi tebilemba balala lemsatepdar; kari iba telemtetba pelaa agizüker aser karibo iba inyakyimji komaka asütsü, ta ratamatar. Opposition NPF-i state nung lisopur jangjatsü atema telatetbatemji kechisa’ar RIIN sangdong nung shia mali, ta ashishiogo. Ano Congress Tir, K Therie-ia, sorkari iba inyakyim ya kanga aritepa renemner ama reprangteter; iba inyakyim ya kanga tongtibang, anungji iba onük nung stateholders den tama o lemtepmatsüla, ta shiogo. Naga Hoho Federal Assembly Secretary, K Elu Ndang-ia, “Iba inyakyim metenzükdang lokti tentettem densema tapet sabang ka nung tama o lemteptsü nüngdak,” ta shiogo. Assam nung NRC maparen nung tajangzük aser takoksa kuli jangjatsü atema ano mapang agitsü lia Nagaland nunga Register of Indigenous Inhabitants of Nagaland (RIIN) maparen ya tenzüker, anungji ketdangsertemi tip ajaklen nungi kanga shisadanger ang iba maparen tenzüker südi ta amanger. Assam nung NRC aser Nagaland nung RIIN inyakyim nükjidong ataloktsüsa inyaktetra state ana ajangzükba dang masü saka tanüngba northeast state tem-a kanga ajangzüktsü, kechiyong state ana nung inyakbaji tanüngba state temi repranga atatsü.