Hotel, homestay business ajungkettsütsü atema sentong ka agi

Mokokchung, July 4 (TYO): Mokokchung Chamber of Commerce & Industry (MCCI) den yaritepa Investment and Development Authority of Nagaland (IDAN)-i “Airbnb” dak sentakba maparen indang shisatokden sentong ka July 4 nü Mokokchung State Bank of India, Regional Office, Conference Hall nung ayongzüka kaogo. Airbnb ya alima nung online ajanga maparen tapu balala inyakba market tulutiba ka lir.
Iba sentong nung Airbnb, Nagaland in-market host acquisition specialist, Zhokhohulu Curhah tongti shisalen sayur liasü. Sentong nung Mokokchung nung aliba hotel kibur, lodge kibur, homestay kibur aser travel and hospitality industry nung jangrartem parnok 40 dak tali arua shilem agia aden.
Iba sentong ya tongtibangsa Mokokchung district nung hotel, homestay aser lodge amshirtem business tajungba kümdaktsüba den külemi iba luyim tsütsü talisa lanurtem nem lenmang lapokja mapa inyaktsü atema maongka agütsütsü aser ibaji ajanga rongsen lenmang renloktsü aser raliwalirtem puadaktsütsü nükjidong nung ayongzük.