Economic Survey 2019 sayaogo ; Retirement küm atsülangtsü

New Delhi, July 04 (Agencies): India nunger fertility rate ajemba aser life expectancy timba akümba kuli ajanga 2031-41 tsüngda nungbo nütsüng ainba shilemji 0.5% tekübok asütsü imlar, ta survey ka ajanga bushitetogo.
India nung life expectancy timba akümba ajanga linük nung mapa inyakertem mapa nungi anisüngzükba arishi küm tang 60 aliba nungi ano timba akümtsüsa akümer, aser ibaji mepaidoktettsü, ta Economic Survey ajanga metetdaktsü.
Iba survey nungji ajemdaker India sorkari mapa nungi anisüngzükba arishi küm atsülangtsü atema benokogo.
Brihostibarnü Parliament nung Union Finance Minister, Nirmala Sitharaman-i 2018-19 kümsük atema benokba Economic Survey ajanga, “Mapa nungi anisüngzükba arishi küm ajungkettsüji mepaidoktettsü, anungji iba atemaji jelia inyaktsü junger. Iba temelenshiji marudang küm ter jelia inyaktsüla, ibaji ajanga mapa inyakertem renema atatsü,” ta metetdaktsü.
Economic survey ajangasa, ibaji ajanga pensions aser mapa nungi anisüngzükba mapang nung tanga inyakyim balala atema renema litettsü, ta metetdaktsü.
India nunger tetsür aser tebur naprong life expectancy tanen makai timba akümtsü imlar, anungji tanga linüktem nung temelenshi aliba den liromedema tetsür aser tebur naprong atema mapa nungi anisüngzükba arishi küm atsülangtsüla, ta kasa survey nung shia lir.
Economic survey ajangasa, taruba küm 20 tsüngda India nütsüng ainba shilem ajema akümtsü, 2021-31 kümtem tsüngda shilem 1 den tajemba akümtsü aser 2031-41 kümtem tsüngda shilem 0.5 den tajemba asütsü, ta metetdaktsü.
Survey ajangasa, tanga linüktem nung mapa nungi anisüngzükba arishi küm ajungkettsü atema inyakdar, item rongnung Germany nung 2023 küm tashi nungbo mapa nungi anisüngzükba arishi küm 66 asütsü, Australia, US, UK aser Japan linüktem nung arishi küm 70 asütsü atema benoka lir, ta metetdaktsü.
Germany, France aser US linüktem nung taoba mapang nunga mapa nungi anisüngzükba arishi küm ajungketogo. Ano Australia aser UK nungbo tebur dang nungibo tetsürtem tama mapa nungi anisüngzükdaktsütsü mela, ajisüaka tetsür-tebur ajak kasa kümtsüogo.
Germany, UK aser US linüktemibo parnoki mapang shia mapa nungi anisüngzükba arishi küm atsülangtsü ta sangdongogo.
Tatishitsü agi, UK nung taküm October ita tashi nungbo pension kümji tetsür aser tebur naprong atema arishi küm 66 asütsü. UK sorkarisa 2026-28 kümtem tsüngda pension atema arishi küm 67 akümtsü aser 2044-46 tsüngda 68 akümtsü sentong lir.