Kohima-Dimapur lenmang NH-29 nung ali anenoka ai

Kohima-Dimapur tsüngda lenmang anenoka aiba sülen gari anendena aliba noksa nung angur.

Kohima, Chiteni/July 04 (TYO): Brihostibar anepdang Kohima aser Dimapur na tsüngda lenmang National Highway-29 nung gari lenmang metre 15 shi nung ali metre 2 anenoka ia tzü mobangba ajanga gari 100 shi anendena liasü, ta osang ka ajanga metetdaktsü.
Bodhbarnüa Kohima Municipal Council (KMC) pur jana indokba tesem tejenba anasa gari lenmang anenoka aiba yanglushiba sülen tanüa lenmang anenoka ai.
Brihostibarnü jana indokba tesem tejenba anasa osangbenertem den jembidang executive engineer, Public Works Department (PWD) (NH division), Vikeshe Yepthomi-i, “Bodhbar nungi tenzüka ali anenoka air aser yasüng 8:00 ako tashi machine ana amshia mapa inyaka liasü. Lenmang yanglushiba sülen gari tulutem dena senzü. Ajisüaka aonung 11:00 ako tashi nungbo ano ali anenoka aiba osang angashi, saka tzünglu aruba agi onoki mapa meinyaktet. Tanep 6:30 ako tashi onoki mapa inyaka liasü,” ta metetdaktsü.
Yaküm-a KMC jana indokba tesem anasa tesem asem nung anentsüh alua liasü aser tanüa item tesem rongnungi ka nung ali anenoka air.
Yepthomi-isa, Brihostibar anepdang truck ka lishi nung garitsüng belemokba sülen nungi gari 100 ka dak tema lenmang nung anendena liasü, ajisüaka machine amshiba den police-i yaritepa truck ji lishi nungi atsütet, ta metetdaktsü.
Yepthomi-isa Brihostibar aonung nungi gari tilatembo senzütettsü imlar, ta ashi.
“Tsüngsang-mopung dang jungra onoki tajungtiba agi inyaktsü. Tzünglu marura taonung nungibo gari senzütettsü. Onoki gari tali meshisemogo, anungji asüng nungibo machine tali amshitettsü,” ta paisa shisem.
Yaküm July ita nunga kasa tesem anasa anentsüh alua lenmang metre 400 dak tema anenbanga liasü, aser September 29 nü ang lenmang lapok.
2018 küm lenmang yanglushitsü atema Nagaland State Disaster Management Authority (NSDMA)-i sen lakh 55 agütsü ajisüaka sen crore 1 shi indoka yanglushi.