Budget nung shisaliok rejutem atema sen crore 400 lemzüktsü

New Delhi, Chiteni/July 05 (Agencies): India nunger shisaliok jenjang nung temenlenshi tulu adokdaktsütsü nükjidong nung Centre sorkari New Education Policy sangdongogo, koba ajanga linük nung aliba shisaliok rejutem International jenjang nung ajungkettsütsü, ta tanü Parliament nung Union Budget benokdang Union Finance Minister, Nirmala Sitharaman-i metetdaktsü.
Linük nung research ecosystem jenjang tajungba akümtsü atema National Research Foundation ka atentettsü, ta Minister-isa metetdaktsü.
“Küm pongu tejaklenbo top 200 International educational institutions nung India nunger rejubo ka danga maliasü. Tangbo top 200 nung higher educational institutions asem tashi lir- IITs ana aser IISc Bangalore,” ta Sitharaman-i metetdaktsü.
“New National Educational Policy benokba ajanga India nunger shisaliok jenjang ajungkettsütsü; school system nung temelenshi adoktsü,” ta lai shisem.
Financial Year 2019-20 atema Union budget nung “World Class Institutions” amenoktsü atema sen crore 400 lemzüktsüogo, aser iba senji yaküm dang nungi asemben agi timba lir.
Finance Minister-i, sorkari New National Education Policy benoktsü, koba ajanga India nunger higher education system ya alima nung tajungtiba rongnung ka kümdaktsütsü; iba inyakyim ajanga school aser higher education nung temelenshi aika adoktsü, inyakyim tajungba akümtsü aser research o innovation nung taliba rangloker inyaktsü, ta metetdaktsü.
Research aser innovation nung nükjidong ataloktsü atema Finance Minister-i National Research Foundation (NRF) ka tentettsü, ta metetdaktsü.
Finance Minister, Sitharaman-isa, ‘Study in India’ programme ka tenzüktsü, aser iba sentong kübok bendanger kaketshirtem India-i arua shisaliok bushitsü atema rangloker inyaktsü, ta ashi.