Kohima DC, Anoop Khinchi den tepila sentong agi

July 05, 2019 nü Kohima DC mapa nungi anensang, Anoop Khinchi IAS den tepila sentong agiba sülen officers & Staff temi pa den külemi tangokba noksa nung angur. 

Kohima, Chiteni/July 05 (TYO): Kohima Deputy Commissioner menden nungi anensang, Anoop Khinchi, IAS den tepila sentong ka tanü July 5, 2019 nü Kohima DC conference hall nung agiogo, ta ketdangsertem osang ka ajanga metetdaktsü.
Anoop Khinchi, IAS-i ita pezü atema dang Kohima DC inyak, ajisüaka mapang tatsüka tsüngda pai mapa aika inyaktsüogo.
Pa mapang nung takok ngua inyakba mapatem rongnung 2019 Lok Sabha Elections junga agitetba densema lir.
Tepila o jembidang Anoop Khinchi-i pa atenzükba mapang nung administrative staff ajaki temeim agi pa nungita amalitepa inyakba atema pelaba lemsatep.
Paisa Kohima nung aliba nüburtemi pa den amalitepa yaritepoba atema pelaba lemsatep.
Tang tashi nung pa tenzükba wadang nung Kohima DC inyakba jangratatemba liasü aser pai ibaji tarutsü nung kanga menungraa bilemtetsü, ta metetdaktsü.
DC office nung officers & staff tem tenüng nung jembidang Kohima ADC, Lithrongla T Rutsa-i, pa ama mapang nung kanga tenendak ketdangser ka mapang tatsüka dang tenzüker anenba atema mepelar, ta ashi.
Laisa, DC nungi anener, Anoop Khinchi, IAS dang nungi parnoki aika angazükogo, ta ashi.
Pa mapang tatsüka dang tenzükyonga office nung inyakyim temelenshi aika adokogo, ta shia lai Dimapur DC tajungba nung inyaktsü sarasademtsür, ta ashi.
District Planning & Development Board (DPDB) tenüng nung jembidang KMC Administrator, Kovi Meyase-i, DC mapa nungi anensangi mapang tatsüka dang tenzükaka kanga nendaka inyakba ajanga District atema mapa tajung inyaktsüogo, ta ashi.