Kalaigaon tatalokba atema tantrik Ramesh Sahariah puogo

Udalguri, July 9 (Agencies): Udalguri kübok Kalaigaon nung lendong ka atalokba atema tongti süa tai tonglokja alisang Darrang aser Udalguri police-i puogo.
Hombar aonung pei sasa tsüngrem nisung aser tantrik ta ajar Ramesh Sahariah apu.
Ramesh Sahariah-i ashiba angaa science tesayur Jadab Sahariah’er kibongi kidang tekülem ki ka nung mangsa külemküja mapa ka inyaka liasü.
Pulakesh Saharia ya bachelor of computer application azünger ka liasü aser pa ya Jadab Sahariah liasü. Külemküja asüdang Pulakesh-i mapa tamajung inyak aser par kinungertem indang süoshitem mi agi rongdoktsü.
Iba osang ta tebu Jadab Sahariah-i ashi. Jadab ya tang Gauhati Medical College and Hospital (GMCH) nung anepaludar.
Pulakesh-isa pa indang Royal Enfield Thunderbird motorcycle tasen aser par Wagon-R gari mi agi rongdok.
Jadab Sahariah tenu’er asirhi küm 3 tain tanur ka parnoki tepseter bendanga agütsütsü merang aser yimdaklirtemi ibaji noktangtsü atema police jaoka liasü.
Jadab Sahariah’er kinungertem police amaktsü tenzük aser iba jagi parnoki injang khadoktsüsa aküm. Idangji Jadab Sahariah aser Pulakesh Sahariah na yirur GMCH-i anir ao anepalu saka idakji Pulakesh asü.
Jadab Sahariah-i ashiba agi “iba tatalokba ya tantrik Ramesh Sahariah ajanga alir aser pai tenüng agitsü.”
Ramesh Chandra Saikia ta ser nisung kati police tsüngdang FIR benokba sülen Kalaigaon police-i Ramesh Sahariah apu. Pa ya Darrang district kübok Kuruwa nung par kinunger ka ki nung jenoka liasü.
Hombar aonung police-i pa jenoka aliba tesem bushiteta pa apu. Iba sülen pa Tangla police station-i anir ao.
Udalguri superintendent of police, Longnit Terang-i osangbener den jembidang ashiba agi “onoki putir dangji asüngdangya südar aser kuli aika ngutetogo saka tangbo itemji meshii alitsü kechiyong bushisüngdang nung timtem ajurutsü.”
Sahariah’er kibong taoba küm 11 tashi iba tantrik den tesentaktep lia arur ta parnok kiyongertemi ashi.
Ramesh Sahariah-i tuyuba ama science tesayur Pulakesh aser kinungertemi külemküjaba maparenji inyak ta kidangertemisa ashi.
Küm asem tejakdang Jadab’er jala aser Pulakesh tenu Hemashri asüba süken nungi par kibong nung ‘tantric’ külemküja mapa inyaka aru ta yimdaklirtemi ashi.
Par kidang aliba Shiva temple tsünglanglen hon aika lir ta Ramesh-i parnok dang ashi, ta tebu Jadab-i osangbener dang metetdaktsü.
Jadab-isa ashiba agi, par jabaso Pulakesh ji computer applications nung graduate ka liasü saka mapa mangu aser Ramesh-i par kibong dang tanur ka bendanga agütsüra mapa angutsü ta ashi.
Pulakesh tetsü Punyakanti-ia ashiba agi, Ramesh-i parnok dang iba külemküja asüba sülen jala Hemashri shia arutsü ta ashi.
July 8 nü Punyakanti-isa “ozü jala Hemashri ji Ramesh-i tepset” ta metetdaktsüogo.