India nung moko achir shilem 53 arishi 20-30 tsüngdapurtem lir

New Delhi, July 09 (Agencies): Tang India nung temesepba moko achirtem noklang shilem nung shilem 53 bo arishi küm 20 nungi 30 tsüngdapurtem lir, aser parnok timbakati anibelem aliba agi moko achir ta shiogo, ta survey ka ajanga metetdaktsü.
Aviss Foundation-i agiba survey ajanga ashiba agi, arishi küm 15-50 tsüngdapur nisung asem nungi nisung katibosa moko achir.
“Iba survey nung telangzüba agütsürtemji arishi küm 15 nungi 50 tsüngdapurtem liasü aser parnok rongnung shilem 33-ibo moko achiba yimya sübaba nangzükogo,” ta kasa survey ajanga metetdaktsü.
Iba survey telangzüba nung lanurtem aikati anibelem koktettsü atema parnoki moko achir, ta ashi.
“Survey ajanga bushitetba agi, moko achirtem shilem 56-i, moko achiba ajanga parnoki anibelem nungi anisüngzük anguba nung yarir ta ashi aser shilem 55-i, moko achiba ajanga timtem balala adokba indang parnoki meteta lir, iba denji külemi temang anema alitsü atema-a bilemer, ajisüaka moko achiba yimya meindokteter ta shiogo. Iba dak alia moko achir shilem 55-i parnoki moko achiba yimya indoktsü merangogo saka makoker, ta ashi; ibaji ajanga moko achiba ajanga yimya sübaa meindoktetba kuli angur,” ta Aviss Foundation-isa metetdaktsü.
Moko achiba ajanga nisung jenti asüba aser temang manemer jenti aliba linüktem rongnung India densema alir.
World Health Organization (WHO)-i ashiba agi, alima nung moko achir noklang shilem nung shilem 12 bo India nunger lir.
“India nunger sorkari awareness programmes nung rangloker mapatong inyaker. Iba survey ajanga iba tebilemtsü atema ano taliba meranga inyaktsü temaitsü sayur,” ta Aviss Foundation tongti¸Prerana Garg-i metetdaktsü.