Arunachal nung tzünglu kanga aruba ajanga timtemer

Itanagar, July 9 (Agencies): Arunachal Pradesh nung tzünglu kanga aruba aser tzümetsüng ajanga tesem aika nung nübortem timtemer.
West Kameng District kübok Kaspi Nala nung tzümetsüng ajanga nisung 800 shi ka timtemer aser aika samar mangur ta osang ajanga ashi.
Tzümetsüng ajanga Kaspi aser Nagmandir tsüngda RCC apu ka ponger ao.
Army aser paramilitary forces den disaster management ketdangsertemi timtemertem kümzüktsü atema mapa inyakdar.
West Kameng district administration-ia Balipara nungi Tawang tashi lenmang shibangogo.
Hombarnü tzünglu kanga aruba ajanga nikongtsütsü tzümetsüng timtem ajuru aser idangji ki pezü den gari aser motorcycle aika raksa.
Taküm April ita nunga West Kameng district yimtiba Bomdila nung tzünglu kanga aruba ajanga tesem aika nung teraksa tia ajurua liasü.
Yashi district headquarters nung ghonda ka tema tzünglu kanga aruba ajanga iba timtem ajuru.