Karnataka onük o nung LS senden nungi opposition ayazüka alu

Bengaluru, July 09, 2019: Mongolbarnü Bengaluru nung Vidhana Soudha kima Mahatma Gandhi kürakyanglu anasa taoba Chief Minister, Siddaramaiah, Karnataka Congress Tir, Dinesh Gundurao, Deputy CM, M G Parameshwara aser tangartemi longkak aitba noksa nung angur. 

New Delhi, July 09 (Agencies): Karnataka nung Congress Party aser JD-S MLA tem aikati anenba ajanga teloktep sorkar nung mepetmesü adoka aliba onük nung ajemdaker tanü Congress aser DMK densema opposition party aikati Lok Sabha senden nungi ayazüka alu.
Zero Hour mapang nung Congress-i iba onük nung o lemteptsü atema mepishi, ajisüaka Lok Sabha Speaker, Om Birla-i memelungba sülen rongrong tulu adoka liasü.
Congress aser DMK MP temi Speaker sabang anasai oa “onoki ochi obendang aginer” aser “kijai tashi amshiba anenang” ta yimyim ayima liasü. Congress lenirtemi pei menden nungi mener iba takhangba agütsü, ajisüaka Speaker-i, iba onük nung jembitsü atema Hombarnü pai Congress nem temelaba agüja liasü, ta shia iba onük nung o lemteptsü memelung.
“Iba senden ya municipal corporation hall ka mesüaka mekümdaktsütsüla,” ta Birla-i ashi.
Birla-i, iba senden ya züngsem ajak asoshi lir, anungji yimyim mayimtsüla, ta ashi.
“O toktepang, ajisüaka ajaki melungra yimyim ayimba aser ozülu sayuba anentsüla,” ta Speaker-i ashi.
Lok Sabha senden agiba ya nüburtemi reprangdar, anungji züngsemtemi yimyim ayimba anentsüla, ta pai ashi.
Sorkar aija Lok Sabha nung Congress lenir, Adhir Ranjan Chowdhury-i, nübo mesüzükba politics anenang, ta ashi.
Congress-isa, BJP-i MLA tem mesüzüktsü merangba ajanga Karnataka nung Congress-JD-S teloktep sorkar atsüngdoktsü meranger, ta aitsü.
Chowdhury-i, “Linük tejakleni anitsü atema opposition teinyaktsü tongtibang shilem ka lir. Onoki iba onük nung ola adoktsü. Telemtetba agitsü atema sorkar dak temeden lir. Onoki ozü teinyaktsü shilem inyaker. Mesüzükba politics ya anentsüla,” ta ashi.
Paisa, Karnataka sülen BJP-i Madhya Pradesh nunga Congress sorkar atsüngdoktsü merangtsü, ta ashi.
Congress-i yimyim ayimbaji tim dang, kechiyong BJP lenir, Arun Jaitley-ia yimyim ayimbaji opposition tasa ka lir, ta jembiogo, ta paisa ashi.
Chowdhury-i, “BJP-i aniba sorkar ajanga democracy lendong nung lir,” ta ashi.
Karnataka nung mepetmesü adokba nung BJP-i shilem agia mali, ta BJP-i jembiba aija Congress leniri, ‘süra kechiba MLA tem atema gari aser tayimtsü renema liasü?’ ta asüngdang.
Iba onük nung sorkari telangzüba magütsüdang Congress, DMK, NCP aser National Conference nungi züngsemtemi senden nungi ayazüka alu, ajisüaka Trinamool Congress aser BSP-ibo senden nungi ayazüka malu, aser ibaji ajanga BJP nung dena maliba party tem tsüngda telongjem maliba sayur.
Congress-i tai tongloktsüba langzüka Defence Minister, Rajnath Singh-i, Congress-i Karnataka nung yimtenren tensa makoker; iba ya Congress indang telung onük ka dang lir, ajisüaka parnoki Parliament nung timtem agütsür, ta ashi.
Congress aija Rajnath-i, “Tang Karnataka nung atalokba ya Congress indang telung onük ka dang lir. Ajisüaka parnoki iba timtem mekokteti Parliament Lower House (Lok Sabha) nung timtem agütsütsü meranger,” ta ashi.
Rajnath ya Lok Sabha nunga Deputy lenir lir, aser pai ashiba agi, Hombarnü Congress-i iba onük süokogo, saka ano tanaben iba onük süoker, ta aitsü.
Mongolbarnüa Congress MLA ka anenba sülen Karnataka nung JD-S lenir, H.D. Kumaraswamy-i aniba sorkar mepetmesü tuluba kümogo. Tang tashi nung Congress-JD-S teloktep nungi MLA 17-i anenba shidi agütsüogo.