NAPTC nungi tanurtemi Raj Bhavan semdang

Kohima, July 09 (TYO): Tanü Nagaland Angh, PB Acharya-i tanurtem dang kaketshir ka ama pei mapa- studies nung temelung agütsütsüla aser pei wadang nung wangshitsüla, ta ashi.
Nagaland Armed Police Training Centre, Chumukedima nung ketdangsertem aser staff tem chirnurtemi tanü Raj Bhavan, Kohima semdanga Angh, Acharya ajurua liasü, ta PRO to Governor sangdong ka nung metetdaktsü.
Angh-i, ajak kasa lir, anungji kaketshirtemi pei sempet nung rangloktsüla aser nükjidong ataloktsü atema inyaktsüla, ta ashi. Terenlok indang tongshiji shisaliok lir, ta shia Angh-i kaketshirtem dang kaket shisatsü bushiba nung kanga temelung agütsütsüla, ta ashi.
Paisa tanurtem dang skill course balala agitsü aser shishilembaba maparen nung ajemoktsü ajungshi.
Tanurtem Raj Bhavan nung pelaa agizükdang Commissioner & Secretary to Governor, Dinesh Kumar, IAS-i, Raj Bhavan semdangba den Angh den jembitsü maongka junga agiang, ta ashi.
Commandant, NAPTC, Ben Longkumer-i, NAPTC nung Family Welfare Association lir aser iba Association nung Tirji pa kinüngtsü lir, ta ashi.
Paisa, iba association nükjidongji lenla ajungalen terenlok alitsü aser welfare schemes balala indang khuret meteta inyaktsü, sepaitem indang kinüngtsür aser chinurtem skill building lir, ta ashi. Paisa, tang Kohima semdanga tesem balala reprangba ya welfare inyakyim dak sendakba ka liasü aser NAPTC nungi tanurtem mei sodi mapang nung group activity ka liasü, ta metetdaktsü.
Commandant-isa Angh den pa kinüngtsü nati Raj Bhavan nung tanurtem jaokba den külemi chiyungdaktsüba atema pelaba lemsatep. Tanurtemia sobaliba ken ka tena liasü.
Arishi küm 10-23 tsüngdapur tanur 52 den Unit Officers aser NAPTC Family Welfare Association nungi züngsemtemi shisalemsatep sentong nung denogo.