Kiphire nung ICDP indang Beneficiary Training agi

Kiphire, July 09 (TYO): July 09 nü Hopongkyu Memorial Hall, Kiphire nung ‘team work and work ethics’ omen nung ajemdaker Integrated Cooperative Development Project (ICDP) Beneficiary Training agiogo, iba sentong nung tetushi tejaokerji SDO (C) HQ, Nyempo Walling liasü, ta ketdangsertem osang ka ajanga metetdaktsü.
Iba sentong nung jembidang SDO Civil-i, Kiphire district ya ‘aspirational district’ ta sangdongba sülen terenlok mapa aika inyakogo, ta metetdaktsü.
Laisa Kiphire district nüburtem dang tanga districts nema tayongzükba agütsütettsüsa inyaktsü ajungshi.
Lai bank nungi loan agia alir registered societies dang mapang shidak nung loan sentsüh aotsüla aser society tenüng tajung ajungkettsü merangtsüla, ibaji ajanga tarutsü nunga loan agitsü atema lenmang lapoker, ta ashi.
Laisa Cooperation Dept. danga district Administration den amalitepa külemi longjemer inyaktsü ajungshi.
Joint Registrar, Cooperative Societies HQ & Monitoring Officer ICDP Kiphire, Temjen Longkumer-i, Cooperative movement ya 1904 küm tenzük; cooperative mapa ya sensakertem taküm jenjang yangertettsütsü atema lir, ta ashi.
Paisa district nung register süa aliba societies dang peipei society renloktsü atema senotsü tera agi asüyonga mapa tenzüktsüla, ta ashi.
“Cooperative society ya nüburtem atema lir, anungji society-i sen ajangzüktetta züngsemtem tsüngda lemsatsüla,” ta pai ashi.
Chief Project Officer-i, ICDP ya mapa inyaktsü atema sendong lir, anungji society temi kanga shisa kaa amshitsüla, aser mapang shidak nung loan meyipa agütsütsüla, ta ashi.
Paisa society tem dang mapa inyaktur manentsüla, ta shisem.
Hurung Village Chairman, Chemlongse-i society tem dang sorkari agütsüba senji kanga ochishia amshitsüla, ta ashi.
Lipoknungsang-i lokti pelaa agizükba o jembi aser Development Officer ICDP, Athonlo Thyug-i tepela anküp o jembi. Iba sentong ya Development Officer ICDP, Tsipongse Anar leniba nung agi. Iba training ya July 10 nü tembangtsü.