Kuki nunger Territorial Council ajanga Naga litsü nung mokonghitsüla: UNC

Imphal, July 9 (Agencies): Kuki telungpurtemi Nagaland nung Territorial Council ka tentettsü akhangba nung ashishitep kecha mali ta Mongulbarnü United Naga Council (UNC)-i metetdaktsü.
Ajisüaka, iba ajanga Naga nunger sobaliba litsü nung mokongshitsüla aser onoki ali inch ka danga magütsütsü, ta UNC-i ashi.
Telungpur teloktemi Centre aser state sorkar den yimten olemtepa arudang Territorial Council (TC) ka tentettsü takhangba agütsür.
Kuki National Organisation (KNO) aser United Peoples’ Front (UPF) teloktemi August 22, 2008 nü India aser Manipur sorkartem den suspension of operation (SoO) tenangzüktep agia liasü.
Manipur nung Kuki telungpur telok 25 aliba nungi 17 tashi KNO kübok lir aser UPF kübok 8 lir.
Parnoki mezüngbo Kuki nunger atema state balaka kümtettsü atema takhangba agüja aru saka tang Territorial Council ka tentettsü atema melenshiogo.
July 5, 2019 nü presidential council senden nung UPF aser KNO teloktemi Territorial Council akhangba onük benoka jembiogo aser iba nung ashishitep kecha mali, saka iba ajanga Naga litsü nung mokongshitsüla, ta UNC-i metetdaktsü.
Naga nunger lutsü, maitsü, putiotsü aser temetentem ya jungjunga amenteta lir aser tanü tashi nisungtemi aser rongsen ajanga itemji kümzüka aser wazüka ayur, ta UNC-isa ashi.
Naga lisopurtem indang arrtsü kanga junga lateta lir aser tezüluba nunga junga bendena lir. Tawa ang tanga teloktemi ozü litsü telungi ait aser Naga yimtsüng ketdangsertemi telatetbatem agütsüba sülen anidaktsü ta asüba sülen ang parnok ozü litsü nung lidaktsür” ta UNC-isa metetdaktsü.
Centre-i Naga nunger litsü, maitsü, putiotsü aser temetentem akhümtsübua mapa inyaksangshitsü ayongzüker, ta parnokisa shisem.