Karnataka Speaker-i MLA 8 indang shiditem magizük

Bengaluru, July 9 (Agencies): Congress-JD(S) MLA 13-i Assembly nungi anenba shiditem agütsüba ajanga Karnataka sorkar loksaa aotsü tia ka nung lir.
Ajisüaka, tanü Speaker K R Ramesh Kumar-i MLA 8-i züluba shiditem shitak masü ta shia magizük aser parnok dang tezülutsü tim zülur agütsüshiang ta tetuyuba agütsü.
“Ni kanga dang shisa kaa telemtetbatem agitsüla. Ni inyakba mapa ajakji putiotsü nung züluoktsü, anungji ni aibelena meinyaktsü. Tarutsü pututemi kü dak tai maputsüsa ni inyaktsü” ta Speaker Kumar-i ashi.
Speaker-isa shidi shitak zülur agütsüba MLA 5 dang taruba Hokolbar aser Hombar anogotem pa den tsüngdong arua ajuruteptsü atema tetuyuba agütsü.
Maneni, Congress nungi anenja aliba MLA Roshan Baig-i tanü Assembly nungi anentsü atema züluba shidi Speaker indang office-i reprangdangdar.
Congress legal cell-i pa dang shiditem magizüktsü atema shidi zülu asü masü ta osangbenertemi asüngdangdang “Ni Honibarnü office toktsür ao aser tanü ang arur. Shir cell-i zülua liaka, ni tang ang reprangdangtsü” ta Kumar-i langzü.
Speaker-i MLA tem dang tanaben shidi zülushitsü tuyuba ajanga Congress-JDS teloktem mapa inyaktsü atema mapang angutsü, kechiyong iba tatalokba nung BJP-i tajangzük angutsü atema meranger.