Diphupar B Chakhesang Baptist Church VBS tenzükogo

Dimapur, Chiteni/July 11 (TYO): ‘Armor of God” omen nung ajemdaker Chakhesang Baptist Church Diphupar Children Ministry ajanga Vacation Bible School ayonga July 11 nü tenzükogo aser July 14, 2019 anogo tashi agitsü.
Iba VBS tenzükba sentong nung Akokla Letro aser Akholu Phesao nati tesayurtem aser Sunday school tanurtem den Yohan 15:16 nungi ajungshia liasü. Tangartem asoshi süngjang tajung tangtsütsü mechi Tsüngremi na shimteta lir, anungji nai mezüngbuba nung Tsüngrem shimtsüla aser Tsüngremi sayuba ama kati ka dang meimba ajanga süngjang tajung atangtsü, ta o jembiri ashi. Asenoki asen teyanglur sülen anidakra pasasa temoatsü angutsü aser asenok Tsüngrem chir akümtsü, ta Akokla Letro-i ashi.
Tanurtem tanüla nung samaa aoba nungi kümzüktsü aser sodi mapang medemer aser kinungertem den amajok nung mapang indokba nungi anidena Tsüngrem tenzükba nung shilem agidaktsütsü mechi Chakhesang Baptist Church Diphupar Children Ministry ajanga iba VBS ya ayongzük, ta laisa ashi.
Iba ama camp ayongzükba ajanga tanurtem temang aser tanüla nung tashi ita Tsüngrem den tesendaktep takangba alitsü, ta laisa ashi.