NU-i tenüngsang agütsüba sentong ya ayongzüka agi

Dimapur, Chiteni/July 11 (TYO): Nagaland Angh aser Chief Rector Nagaland University, Shri PB Acharya-i, Nagaland ya state nung aliba nüburtemi dang tashi itdaktsütettsü ta shia Nagaland temaba jenjangi ajungkettsü atema Universities dang shilem tajung agitsü ajungshi. Pai iba olen ya Nagaland University, Kohima Campus, Meriema puri July 11, 2019 nü tenüngsang agütsüba sentong ka ayongzüka akaba mapang ashi.
Angh-isa, NU nung tesayur temi tejangraba tulu nung bendanga agüja inyakba atema tenüng asangba den linük yangerba nung maneni shilem tajung agitsü ajungshi.
Paisa tesayurtem dang mapang shia kaketshirtem nem tangazükba balala agütsüba yimya asadangshia alitsü mepishi.
Skill course tem koda tongtibang iba indang jembidang Angh-i, kaketshirtem university toktsür aoba mapang parnoksasa nokdaktettsüla ta ashiba den trade, industry aser educational institution tem tsüngda sensaksem asoshi ayongzük.
Mapa dak sendakba nung nüburtem tebilemdangba melenshitsüla. Government sector ya bangdaka lir anungji kaketshirtemi parnoksasa nokdaktettsüsa course tem agia entrepreneur kaka akümtsüla, ta Angh-i shisem.
Vice Chancellor NU, Prof Pradeshi Lal-i o jembiba mapang, Angh Acharya-i maneni ajungshiba aser University tejakleni aotsü atema meranga inyakba atema pa dang pelaba lemsatepba.
Maneni sentong nung Pro Vice Chancellor, Kohima Campus aser Prof Rosemary Dzuvichu-ia o tatsüka jembi aser NU Registrar-i tepela anküp o jembia liasü, ta Governor PRO sangdong ka ajanga metetdaktsü.