RIIN atema lokti tentettem den senden amentsü

Kohima, July 11 (TYO): Indigenous Inhabitant Certificates agütsüba inyakyim junga latettsü aser item ama indigenous inhabitants junga record asütsü nükjidong nung sorkari June 29, 2019 nü Register of Indigenous Inhabitants of Nagaland (RIIN) inyaktsü atema metetdaktsüogo, ta tanü Home Commissioner, Govt. of Nagaland, R. Ramakrishnan-i sangdong ka ajanga metetdaktsü.
Iba dak sendakba nung lokti tentettem aser Tribal Hohos-i tebilemba onüktem benokogo, aser itemji pelaa agizüker, kechiyong democratic lokti ka nung ibaji tamendakdak lir, ta kasa sangdong nung shia lir.
“Tang inyakba maparen ya tang tasen apiteta inyaker aser iba atema lokti balala aser stakeholders nema shilem agidaktsütsü nüngdak, ibaji state sorkar tangatetba. Iba mapatong atema telatetbatem tang ang tenzüker, anungji kanga shisadanga jembir ang tatem küma latettsü. Ajak tebilemba ataloktsü aser sensotem temeden kümzüka ayutsü atema state sorkari lokti tentet balala aser stakeholders den senden amentsü,” ta kasa sangdong nung shia lir.
“State sorkari aritepa telemtetba magitsü ta sensotem dang nangzüker, saka iba maparen nung lokti tentet aser sensotem dendaktsütsü, iba dak alia nübur mesüra lokti tentettemi maginütsüsa aser tashishitep malitsüsa telemtetba agitsü,” ta kasa sangdong ajanga metetdaktsü.