Küntok tezü shibelener ka puogo

Guwahati, July 11 (Agencies): Assam nung aliba Kaziranga National Park nung küntok aika akahba ken otem nung tongti sentong yanglur aser küntok tezü shibelener ka Bodhbar aonung Guwahati nung police-i puogo, ta ketdangsertemi metetdaktsü.
Intelligence osang nung ajemdaker crime branch, Guwahati city police aser forest department-i Guwahati nung Nagaland Guest House mita aodang küntok tezü shibelener ka apu. Paji Toyikhu Zhimomi (alias Master alias Hokopo Zhimo alias Hokup lir) ta jangjaogo. Police ketdangser kati ashiba agi, Kaziranga National Park nung kentok aika shikariba ken otem nung ajemdaker police-i Toyikhu Zhimomi bushia liasü.
“Dimapur nungi Zhimomi ya küntok tezü shibelener ka lir aser küntok khasettsü atema pai yangi alir shikarirtem nem ozüng alema prangpong supply süa liasü. Küntok khasettsü atema pai teams amshi aser parnok nem senotsüa agütsü. Paisa küntok shikaritsü atema Nagaland aser Manipur na nungi shikarirtem yok,” ta ketdangseri metetdaktsü.
“Küntok khasetba sülen shikarirtemi küntok tezüji Zhimomi nem agütsü aser pai itemji Nagaland aser Manipur na ajanga Myanmar aser China ama bendang linüktemi yok,” ta forest ketdangseri metetdaktsü.
Alima nung tezü ka aketba küntok shilem asemsü nungi shilem anabo Kaziranga National Park nung lir. Tesüiba küm 20 tsüngda Kaziranga aser Assam nung aliba tanga national parks nung shikarirtemi tezü ka aketba küntok 200 dak tema khasetogo.