Taruba hopta CWC-i Interim Congress President shimtsüa akok

New Delhi, July 12 (Agencies): Congress Interim President shimtsü atema taruba hopta Congress Working Committee (CWC) senden amentsü, ta tanü osang ka ajanga metetdaktsü.
2019 Lok Sabha election nung tamakok anguba nung ajemdaker Rahul Gandhi-i Congress President menden nungi anenogo.
Brihostibarnü taoba MP, Jyotiraditya Scindia-i, Rahul-i President menden nungi anenba sülen party nung timtem adoka lir, iba ya party atema tetendangba mapang ka lir, anungji party tashi itshitsü nüngdak, ta jembia liasü.
“Party tongti atema tashitait lenir ka nüngdaker. Party züngsem ajaki longjemer inyaktsü nüngdaker, aser Rahul-i tuyuba lenmang nung jajatsü nüngdaker,” ta pai ashi.
Tawa Madhya Pradesh PWD Minister aser Congress lenir, Sajjan Singh Verma-ibo Priyanka Gandhi Vadra Congress President shimtsü temsüa lir, ta shiogo.
Rahul-i President menden nungi anenba sülen party nung lenirtema aika peipei menden nungi anen. Iba dak alia tang Karnataka nung teloktep sorkar- Congress- JD(S) nungi MLA aika anenba ajanga sorkar anokshidar. Goa nunga Congress MLA 10-i BJP nung adentsü atema anenba shidi agütsüogo. Osang angazükba agi Goa assembly nung opposition lenir, Chandrakant Babu Kavlekar leniba nung Congress MLA 10 anener, aser parnoki züluba shidiji agizükra pa nem Deputy Chief Minister menden agütsütsüa akok.
Congress lenirtem aikati UPA Chairperson, Sonia Gandhi dang party President menden agizüktsü mepishiogo, ajisüaka la temang manemi dang aliba agi lai memelunger, ta osang angazüker.