Mezüngbuba Naga IOFS ketdangser asü

Dimapur, July 12 (TYO): Naga nunger rongnung mezüngbuba Indian Ordnance Factories Services (IOFS) ketdangser Chumdemo Ngullie alima nungi pilaogo.
Chumdemo ya Jabalpur, Madhya Pradesh nung Joint General Manager, IOFS inyaka liasü. Pa mapang talangka shiranga arur July 11 nü Yashoda Hospital, Secunderabad nung asü.
Asür Chumdemo Ngullie indang mangji tanü tayimtsü ajanga Dimapur tonga bener aru aser tayimtsü anendak pa nem tetushi agütsüba sentong tatsüka agi.
Iba sentong nung o jembirtemi ashiba agi Chumdemo ji pei asoshi mebilemba aser bendanga agütsüba sorkar ketdangser ka liasü.
Pa dak ajemalu shisatsü aliba aser ochishia inyakba atema nisung aikati pa nem tenüngsang agütsü.
Asür Chumdemo ya August 30, 1968 nü aso aser pa ya 1994 batch Group A service UPSC nungi liasü.
Ministry of Defence kübok pa Jt. GM, IOFS inyaka lia asü. Taoba mapang pai mapang tatsüka atema NEC nung Assistant Secretary inyak.
Dimapur Airport nung pa nem tetushi agütsüba sentong agiba sülen par tasoyim Pangti yimtsüngi pa mang bener ogo.