RTI tashi ilatsür asü ?

Yashi Lok Sabha nung Right to Information (Amendment) Bill agizükba ajanga tarutsü nung India nunger tongtibang rejutem (institutions) koba tiai aitsü ta arendaka o toktep tenzükogo. Opposition densema RTI Activists aikati iba Bill ya ajanga RTI Act aser Central & State Information Commissioners (CIC/SIC) indang jurila tashi ajema kümtsütsü ta bilemer. Right to Information (Amendment) Bill kübok tashishitsü aketba ozüng anaji; Central aser State Information Commissioners (CIC/SIC) indang kümsükji Central sorkari latettsü aser parnok indang itasen, allowances aser tanga telatetbatem-a Central sorkarisa latettsü. Iba bill ajanga Central Election Commission o Central Vigilance Commission na den tashi kasa aliba Central Information Commission indang tashibo ajema kümtsütsüa akok. Tamalen Supreme Court-i, RTI Act wazüka ayurtemji CIC aser SICs lir aser CIC den SICs ji Chief Election Commissioner/Election Commissioners telatetbatem den kasa asütsüla, ta tuyua liasü. Ajisüaka tawa agizükba bill ya SC tetuyuba den meputeper. Küm 14 tejaklen RTI Act agizükba mapang nungi iba ozüng tajungba aser tabensaba akümtsü atema iba Act kübok ozüngtem yanglushia arudar, ajisüaka July 19, 2019 nü Parliament nung benokba Right to Information (Amendment) Bill, 2019 ya ajangabo CIC aser SICs indang nija tashi tajemba kümtsür. India ama ochimashi jenti aliba linük ka nung RTI Act ya ajanga sensotem nem temeden tulu agütsüba sülen iba Act ajanga nisung lakh 40-60 shia tajangzük nguogo. Ajisüaka ano külenbo ketdangsertem anema RTI amshir nisung 80 dak tema tepsetogo. RTI Act mapa küma benokba sülen sensotemi yimdak ration shop, scheme balala indang, RBI, Finance Ministry, demonetization aser Rafale fighter aircraft deal densema tasüngdangba meyirjang aika asüngdanga telangzüba nguogo. Iba dak alia RTI ajanga temaba jenjang nung telemtetba agiba dak sendakba osangtem nguogo, aser iba ya tanga kecha agia masü saka Information Commission nem jurila tashi tulu agütsüba ajanga lir. Item ajakji asadangra RTI Act benokba ajanga sorkar aser ketdangsertem inyakyim teladak küma iba Act nükjidong ataloktsüogo, süra kechiba tang sorkari kanga aritepa iba Act kübok ozüngtem yanglushir? ta aikati süngmanger. Sorkar mesüra yimten nung inyakba mapatem indang nüburtemi metettsü asoshi RTI ajanga temeden agütsüba tetezüji sorkar ket nung akaba temetettsü mesüra sorkari inyakba mapa ajungaji nüburtem asoshi aser nübortem meyong, anungji item maparentemji nüburtemi mangutsüsa mesüra memetettsüsa telung nung mimbanga ayutsü menüngdak. Kechi maparen südir süaka sorkari inyakba mapatem madak kiburji department mesüra sorkar masü saka nüburtem lir. Iba jagi senso kati sorkari inyakba, lemtetba, sentong aser inyakyim indang aser ano sorkar teyari agia inyaker private purtem mapa aser inyakyim indanga densema metettsü RTI ozüng ajanga temeden agütsür. Iba tangatetba nung RTI Act, 2005 ya latetogo, ajisüaka Information Commission ama jurila tashi aliba institution ka nung sorkari teka amouka inyakra RTI nükjidong mataloktsü.