Tripura MP-i Assam tzümetsüng atema mezüng itasen tenlar

Agartala, July 24 (Agencies): Tripura West parliamentary constituency nungi Lok Sabha MP Pratima Bhowmik-i pa indang mezüng itasen nungi Rs 1,00,000 Assam tzümetsüng atema tenla agütsüogo.
Arishi küm 50 tain Bhowmik ya Tripura nung Bharatiya Janata Party indang General Secretary lir.
“Pratima Didi-i la indang mezüng itasen nungi Assam tzümetsüng nung yariteptsü atema Rs 100,000 tenla agütsü. Lai New Delhi nung Assam ketdangser ka ket nung senji agütsüogo” ta BJP lennir Victor Shome-i ashi.
Assam tzümetsüng timtem ajanga nisung 67 tashi taküm samaogo aser district 17 kübok yimtsüng 2,000 dak tema nung nisung 33,55,837 tashi timtemer.
Sorkari yimsüsürtem, celebrity tem aser NGO aikati Assam tzümetsüng atema tenla agüja yariteper.
Assam tzümetsüng timtem atema tenla agütsüba celebrity tem rongnung Akshay Kumar, Amitabh Bachchan, Jatin Bora, Riyan Parag, Abdul Khaleque, Pradyut Bordoloi nungertem lir.
Taküm tzümetsüng timtem ajanga Kaziranga National Park (KNP) nunga shiruru 187 tashi süogo. Shirurutemji küntok 15, shidi ka aser mesü 100 tema lir.