Taruba ‘Operation Lotus’ kong inyaktsü

Karnataka nung ‘Operation Lotus’ takok anguba sülen Bharatiya Janata Party (BJP)-i Madhya Pradesh aser Rajasthan state tem dak tenük yoktsü ama bilemer, kechiyong item state ana nung Congress-i nübo tera agi dang teimba ser sorkartem kümteta lir. Anogo ishika Karnataka indang sorkar tebilemtsü Bengaluru nungi Mumbai aser New Delhi tashi nung oa inyaktepa aruba sülen, Mongulbar nikongtsütsü HD Kumaraswamy-i aniba Congress-JDS teloktep sorkar loksaogo. Karnataka nung ita 14 teloktep sorkari state Assembly nung trust motion nung takok mongutet aser maneni Bharatiya Janata Party (BJP) nem sorkar akümtsü lenmang lapoktsü. Karnataka sorkar loksaba nung parnok indang shilem kecha mali ta BJP-i ashir saka sorkar dak temulung masüba MLA tem BJP-i yariba aser kümzüka ayuba kulitem lir. Karnataka nung BJP indang ‘Operation Lotus’ takok angubaji Congress atema shisabulutsü mapang ka lir, kechiyong parnoki nübo tera agi teimba ser sorkartem kümteta lir aser item state nungji Karnataka nung inyakba ama inyakra, sorkartem loksatsü ana nung dang lir. Yaküm December ita assembly election agidang Congress-i Hindi temulung ta ajaba state asem nungi BJP sorkartem atsüngdoka liasü. Madhya Pradesh nung Kamal Nath-i aniba Congress sorkarji Bahujan Samaj Party MLA ana, Samajwadi Party MLA ka aser Independent MLA asemi yariba ajanga kümteta lir. Yaküm Assembly elections nung Congress-i menden anati ‘magic mark’ metongi menden 114 nung dang takok nguteta liasü. Külen, BJP-ia züngsem 230 agi akümba Madhya Pradesh Assembly nung menden 109 nung takok ngua lir. India yimtenren tensa shisadanga repranger mongintemi ashiba agi BJP-i Madhya Pradesh nung tenük yoka Karnataka nung inyakba ama Congress sorkar atsüngdoktsü ana nung dang lir. Ajisüaka, Kumarawamy’er sorkar anenba sülen taoba Madhya Pradesh Chief Minister aser BJP lennir Shivraj Singh Chouhan-i ‘ozü party-i sorkar loksa odaktsütsü atema mapa meinyatsü saka Congress sasep nung meputep aliba ajanga dang sorkar loksatsü’ ta shiogo. Maneni, Rajasthan nunga züngsem 200 agi akümba Assembly nung Congress MLA 100 lir aser BJP-i menden 73 nung takok nguteta lir. Madhya Pradesh nung ama Congress-i Rajasthan nung sorkar kümzüka ayutsü mapa tulu lir kechiyong Chief Minister Ashok Gehlot aser Deputy Chief Minister Sachin Pilot tsüngda tashi toktepa arur. Anungji, iba ama tia ka nung lia BJP-i tanga state tem yutsür Madhya Pradesh aser Rajasthan nung Congress-i anir kümteta aliba sorkartem loksatsütsü atema ‘Operation Lotus’ mapa inyaktsü südi ta bilemer.