Sorkari e-passports atema inyakdar: Jaishankar

New Delhi, Chiteni/July 25 (Agencies): Brihiostibarnü External Affairs Minister, S Jaishankar-i, sorkari e-passports agütsütsü atema inyakdar, aser mezüngbuba shilem nung e-passports million 22 agütsütsü tebilemba lir, ta metetdaktsü.
Pai ashiba agi, External Affairs Ministry-i sensotem nem chip-enabled advanced security features aliba e-passports agütsütsü sentong lir.
Rajya Sabha nung Question Hour mapang Minister-i, nija ka indang osangtem nung digitally sign asütsü aser chip ka nung osangtemji store asütsü, aser ibaji tang aliba physical passport booklet nung inoksemtsü, ta metetdaktsü.
Nisung kari danga chip ji raksara system ajanga ibaji metettsü aser passport ji tamagila akümtsü, ta paisa metetdaktsü.
Ano tanga tasüngdangba ka langzüdang Jaishankar-i, “Mezüngbuba shilem nung onoki electronic passports million 22 agütsüner,” ta ashi.
Sorkari e-passports yanglutsü atema electronic contactless inlays alizüka India Security Press (ISP) Nashik nem agütsütsü asoshi agizükogo.
ISP, Nashik indang tender aser alizükba maparen renemba sülen e-passport yanglu tenzüktsü, ta paisa metetdaktsü.