Mizoram BJP-i missionary cell amenok

Aizawl, Chiteni/July 25 (Agencies): ‘Pro-Hindu party’ noksa agintsü asoshi Bodhbarnü Mizoram nung missionary cell ka amenokogo. Northeast nung state rongnung Mizoram nung dang sorkar kümtetba nung BJP pur shilem mali.
Party state headquarter nung cell lapokba sentong nung Mizoram unit, tir J V Hluna-i ashiba agi, party puri BJP ya pro-Hindu aser anti-Christian party ka ta nüburtemi tsübua bilemba aginer.
Iba cell ajanga Mizo nunger missionary tem atema 24×7 helpline ka achaayanga inyaktsü. “Iba cell ya Mizo nunger Khristan missionary tem nem linük ajunga nung BJP puri teyari agütsütsü asoshi amenok,” ta Hluna-i ashi.
Paisa BJP ya secular party ka ta shia missionary cell amenokba nükjidong ya Khristan tem atsüa arutsü asoshi inyakba maparen ka masü.
Northeast kübok Mizoram kija nung BJP pur shilem mali. Mizo National Front ya NDA nung shilem ka süaka BJP pur sorkar kümtetba nung kecha shilem mali.
2018 assembly election nung BJP puri Tuichawng constituency kija nung takok angu, kong Chakma nunger timba lir.
State nung BJP puri parnok agizükdaktsütsü nükjidong nung Hindutva noksa agintsü merangogo, saka Mizoram nungeri BJP pur nokdangogo.
Missionary cell ajanga state nung missionary 5,000 shi indang database ka yanglutsü kong parnok tenüng, addresses, phone numbers aser email ID mangaoka ayutsü.
Ajisüaka iba sentong ajanga security tsütsü timtem adoktsü akok ta shi olangtep tenzükogo.
BJP puri iba tebilemdangba ya agintsüogo aser cell tekolakba Lalhriatrenga Chhangte-i ashiba agi, tamalen shisema aliba nükjidong dak aliba party pur tanga nükjidong kecha mali.
Chhangte-i ashiba agi, “missionary tem indang data dak sendakba nung mangajemba kar lir aser nisung kari iba data ya RSS keti aotsü ama bilemer. Ajisüaka missionary tem indang data ya parnok temelaba agirang inoktsü. Iba cell lapokba nükjidongji parnok nem teyari agütsütsüba atema dang lir.”
Paisa, Mizoram BJP-i Rss densema tamangba yimsü anema inyakba aser Khristan missionary tem anema inyakba lokti tentettem anema nokdaktsü, ta ashi.